Shillong, Na
itung 22: U Bah Robert K Jahrin General Secretary ka seng HYC u la ong ban ia ka ain ‘Meghalaya Safety and Security Act’ ka dang khlain ka adong shnong jong ka shnong Madanriting, kane ka ain kaba la wanrah da ka sorkar kan long ka ain ban pynjunjar ia ki nongshong wai kiba dei ki trai shnong. Haba ka sorkar kan shna ia ki rule, hynrei ki rule kin nym lah ban long halor jong ka ain.
Katkum kane ka ain kaba la wanrah da ka sorkar, kala kren shai ba baroh ki nongshongwai ki hap ban leit ai kyrteng ha ki police station, ha kane ka ain kam shym la kren ei ei ba ki trai shnong kin lait, haba la dei ka ain ka hap ban leh lang ia baroh, ki trai shnong kin sa kynduh jingeh katkum kane ka ain namar kam shym la kren ei ei ban pynlait ia ki trai shnong.
Haba ia dei bad ki jaka rung bad jaka mih kaba ka sorkar ong ba kan shna, kam shym la ong ba ia ki briew kiba khlem rung bad mih na ki jaka ba la buh da ka sorkar kan pynshitom ne em, ka kyntien pynshitom kam don, ia ki jaka rung jaka mih lyngba ki kad lynti rel ia kaba la ai kyrteng “felicitation Centre” la thoh shai kdar ba ki briew ki ba don ha kine ki jaka kin long ki nongiarap ym ban kem ia ki mynder ri.
Ka seng ka iohi ia kane ka jingbym don bor jong kane ka ain ba ka sa pyrshah bad dawa ba ka sorkar ka dei ban pyntrei kam ban iada ia ka jaidbynriew da ka ILP, ka jingkam jong u Dr Mukul myntri rangbah ka jylla ba ka MSS Act kan long kum ka ILP ka long kaba bakla shibun, kane ka ain bad ka ILP ka iapher, ka ain MSS Act kamd ei ka ain beh mynder hynrei ka dei ka ain iarap pynrung mynder, ong u Bah Jahrin.
Dei halor kane ka jingbym leh ei ei ka sorkar ban iada ia ka jingwan rung ki mynder sha kane ka jylla ka seng mynta kam ban se ban shim ia ka rain ha ka kti ban pyntrei kam noh ia ka ILP hapoh kane ka jylla da kaba kin leit sha ki rangbah shnong, ki Syiem, ki Doloi bad sha ki ar tylli ki District Council, ka KHADC bad JHADC ba kin pyndon kam ia ki bor jong ki ban khanglad ia ka jingwan tuid ki mynder sha kane ka jylla, wat la ka long beain hynrei ban iada ia ka jaid bynriew kam long beain, la ong u tei u nongialam ka HYC.
U Bah Jahrin, u la ong ba ka jingiakhih jong ki 13 seng ban iada ia ka jylla na ka jingwan tuid jong ki mynder ri sha kane ka jylla bad ka sa mih kane ka ain Meghalaya Safety and Security Act, bad ka sorkar ka sa pynkylla ia ka benami act kaba khlem bor. Kine ki ar tylli ki act ki long ki ain kiba khlem bniat kan myntoi aiu ban don ia ki ain kiba khlem bniat. U Bah Jahrin u la ong ba wat ka riti synshar jong ka Ri ka kren shai hapoh jong ka article ban iada ia ka hok jong ki rit paid.
