Malihaon, Naitung 18: Ka North Frontier Railway kala ong ba ha kine ki 6 snem kiba la leit kan pynlut haduh T.27,655 klur tyngka ban shna ia ki lynti rel ha kane ka thain shatei lam mih ngi jong ka Ri India kane ka long kham bun ka jingmang pisa ban ia u snem 2009 haduh u snem 2014.
Ki jingtrei kiba heh kiba la lah ban pyndep ha kine ki hynreiw snem ki long ka jingkieng Bogibeel ha ka wah Bramaputra kaba jrong haduh 5 km bad kane ka jingkieng ka long ban iaid kali bad ka Rel ia kaba la plie da u myntri rangbah duh jong ka Ri india u Narendra Modi ha u snem 2018.
Kiwei ki lynti rel ki long ha Barak Vally, na Lumding sha Silchar, kawei kaba 503 km na Rangiya sha Murkongselek ia kaba la pyndep ha u snem 2015. Saw tylli ki jylla kiba la pyniasoh da ka Broad Gauge, ha Meghalaya 20 km na Dudhnoi sha Mendipathar ha u snem 2014, ha jylla Manipur ka rel kit briew kaba pyniasoh bad ka Jiribam.
Ha ka jylla Mizoram kaba pyniasoh bad ka Bhairabi ha u snem 2016 bad ha Tripura ruh ha u snem 2016 bad ka lynti rel kaba pyniasoh ia ka nongbah Arunachal Pradesh bad ka nongbah Delhi la pyndep ha u snem 2015. Ia kane ka jingpynheh shuh shuh ia ki lynti rel ha NE kala kot sha ka 972 km bad ia kane la pyndep ha pdeng u snem 2014-2017 bad ha ka jylla Sikkim yn lah ban pyniasoh da ka lynti rel yn pyndep ha Nohprah 2022.
Ia ki nongbah ka jylla Assam, Tripura bad Arunachal Pradesh la lah ban pyniasoh da ki lynti rel katkum ka por ba la buh, haba ia dei bad ki lynti rel kiba dang sah ka NR Railway kala buh ia ka thong ba pyndep ia ki lynti bad dang sah teng ban pyndep noh ia ki.
Ha ka jylla Manipur kaba don 111 km na Jribam sha Imphal yn pyndep ha u snem 2022, ha jylla Mizoram na Bhaiabi sha Sairang 51 km yn pyndep ha u snem 2023, ha Nagaland ia ka lynti rel na Dimapur sha Kohima 82 km yn pyndep ha u snem 2023. Kaba ha jylla Meghalaya ia ka lynti rel kaba 22 km na Teteliya sha Byrnihat yn pyndep ha u snem 2022 bad ha ka jylla Sikkim na Sivok sha Rongpo kaba 44 km yn pyndep ha u snem 2022.
Ka jingthmu ban pyniasoh ia ki jylla kane ka thain sha tei lam mih ngi jong ka Ri India da ki lynti rel bad kiwei ki bynta jong ka Ri india kan iarap shibun ban kyntiew ia ka roi ka par ha kane ka thain shatei lam mih ngi jong ka Ri india.
