Shillong, Kyllalyngkot 16: U General Secretary jong ka party NCP, u Praful Patel mynta ka sngi u la pynbna paidbah ba ka party kan ia khun ha kane ka Election MLA ha ka jylla Meghalaya na ki 42 tylli ki Konstitwensi, 22 tylli na Garo Hills bad 20 tylli na Khasi Hills.
Ha kane ka sngi u la pynbna ruh ia 6 ngut ki kyrtong jong ka party NCP kiba dei na Khasi Hills bad kita ki long u Bah ECB Bamon, na Mookaiaw, u bah Tyngshain Lapang na Mawhati, u John D Sangma na Ranikor, Bah Ronalson Dkhar na Nongthymmai, u Bah Predecessor Rumnong na Pynthorumkhrah, Bah Andrew Charles Gare na Mawthyngkut.
Ia ki kyrtong kiba dei na Garo Hills ynsa pynbna paidbah ha ka jingialang paidbah kaban long ha Tura la shai ka sngi. Haba ia dei bad ki kyrtong kiba dang sah hapoh Khasi bad Jiantia Hills yn sa bnai shen ha kine ki sngi ban dang wan, na ka liang jong ka seng kan ia leh ban ia khun na ki 42 tylli ki konstitwesni ha kane ka MLA Election ban wan.
Na ka liang jong u Patel u la ong ba ki paidbah jong ka jylla Meghalaya ki long kiba shai ha ka jingmut jingpyrkhat bad u don ka jingngeit skhem ba kin nym jied ia ka party kaba wanrah ia ka jingiapher ha ka niam ka rukom, ka riam ka beit, ka bam ka dih, wat la ym shym la kren shai ia ka kyrteng jong ka party hynrei la sngewthuh ba ka dei ka party BJP.
Haba phai sha ki seng reiwlum jong ka jylla u la ong ba ki paidbah kila mad ia ki, kum ka HSPDP, ka KHNAM, ka UDP. U la ong ba ka party NCP kan nym ia trei lang bad ka seng BJP hynrei ban thaw ia ka sorkar ynda la dep ka election kata kin sa ia peit ei ka jingmih na ka Election ka NCP ka don ka jingkymen ba kan ioh ban wan ha ka bor synshar.
Shuwa ban ia kynduh ia ki nongtrei jong ka party na ka liang jong u Praful Patel u la buh ia u Mawnongrim ban tei ia ka ophis jong ka party NCP ha Bivar Road, ha ka jingiadon lang u state preisdent u Saleng K Sangma bad kiwei kiwei ki nongkit kam ka party.
