Shillong, Jymmang 01: Ka jingialang ba nyngkong jong ka Executive Committee jong ka kynhun ki seng bhalang ka dong Shatei Lam Mih ngi jong ka Ri India hapoh jong ka lama North East Forum for Indigenous People (NEFIP) kaba la long ha Shillong kala shim ia ka rai ba kin pyrshah beit ia kino kino ki ain kiba ktah ia ki paid riewlum kane ka thain shatei lam mih ngi, la ong u Convener u Ningthouja Lancha.
Haba kren ha ki nongthoh khubor mynta ka sngi, u Yumnamcha Dilipkumar na ka jylla Manipur u wei na ki nongialam ka NEFIP u la ong ba kane ka kyndhun kam don jong ia dei bad kano kano ka seng sain pyrthei, lada ka BJP ka pyntrei kam ia ka CAB kin pyrshah lada ka Congress ka shna ain ha kaba ia dei bad ka Asylum ruh kin pyrshah lada ka ktah ia ki riewlum kane ka thain.
Na ka liang jong u Theja Therieh na ka jylla Mizoram, u la ong ba ha kane ka jingialang jong ka NEFIP, la shim ia ka rai bad lada ktah ia ka hok long trai jong ki riewlum kane ka thain, ki long kiba la kreh ban pan ia ka jingiada na ka United Nation hapoh jong ka UNDRIP ha kaba ka Ri India ruh ka dei kawei na ki nongsoi ia kane ka jingpynbna ka UN ia ka jingiada ba kyrpang ia ki riewlum.
u Ningthouja Lancha, haba kren ia ka jingdon ki briew hapoh jong kane ka thain shatei lam mih ngi jong ka Ri India, u la ong ba ki paidbah nongshong shnong ki don 5.2 klur ngut bad na kine ki riewlum ki don tang 1.8 klur ngut. Dei halor kane ba kane jingialand jong ka NEFIP kala rai ban ia kyrshan lang ia ki jingdawa la ka dei ka ILP, NRC ne kano kano ka ain ban iada ia ki riewlum.
Haba ia dei bad ki jingeh jong ki paidbah riewlum kane ka thain ynda la ioh ia ka sorkar ha Delhi kin sa leit ban ia kynduh ban ia kren bad ka sorkar pdeng halor ki jingeh ki paidbah riewlum jong ka dong shatei lam mih ngi jong ka Ri India. Kane ka jingialang kala shim ruh ia ka rai ban shna noh ia ka kynhun ba pura jong ka NEFIP.
