Ka NEHU ka dei ban ialam lynti ban kyntiew ia ka pule, ka ioh ka kot ha Meghalaya: Ramesh

Shillong, Rymphang 14: U Ramesh Pokhriyal ‘NISHANK’ uba dei u Myntri Sorkar Pdeng ba peit ia ka pule puthi mynta ka sngi u la plie pyrda ia ka Anath Ashram Secondary School, Language Lab hapoh ka ‘Rashtriya Uchchatar Shiksha Abhiyan’ bad ki prokram bad ka jaka hika mynta ka sngi ha ka skul bah North Eastern Hill University Shillong.

U Myntri u la plie pyrda ia kane da kaba pyndonkam ia ka bor internet ha ka jingdonlang u Myntri Sorkar Jylla ba dei peit ia ka tnad pule puthi, Bah Lahkmen Rymbui, u Vice Chancellor ka skul bah NEHU u S K Srivastava, ryngkat bad ki ophisar ka Sorkar Jylla bad ki nongpyniaid ia ki skul bapher bapher ha ka jylla.

U myntri ka sorkar pdeng u la ong ba ia ka jaka hikai ha NEHU ba kynthup ruh ia kawei ka Agri Business Clinic ha NEHU Tura. U la ong ba kine ki centre kin ai jingiarap ia ka jylla ha ki kam ba iadei bad ka pule bad ka rep.

U Myntri u la kyntu ia ka NEHU kum ka skul bah kiba pawkhmat tam ha ka jylla, ba kan ialam lynti ha ki kam ban kyntiew ia ka pule, ka ioh ka kot bad ka imlang sahlang jong ka Meghalaya.

U la ong ruh ba ki briew jong kane ka jaka ki long kiba shida bad ki samla ki long kiba don sap. U la kdew sha ki katto katne ki kam ba la leh da ka Sorkar Pdeng ban ai jinghikai ia ki nonghikai bad ki samla pule, ban kyntiew ia ki sap bad ban kyntiew ia ka jingseng kam lajong lyngba ki skhim kum ka DIKSHA, Skill India, Start Up India, Make In India, USTTAD bad kiwei kiwei.

U Myntri u la ong ba ka Sorkar ka la ialeh ban pynthikna ba ki samla ki ioh jinghikai kaba biang lyngba ki prokram ban kyntiew ia ki sap jong ki. U la ong ruh ba ka Sorkar ka la shim ia ki sienjam ban ai rynsan ia ki ba kin kiew shaphrang.

U la pynsngew ia ki jingangnud jong u ba un iohi ia ki mar ba la pynmih ha India da ki briew ka ri kiba la seng kam lajong ha man ki jaka ka pyrthei da kaba bynrap ba kane ka lah ban long lyngba ka prokram “Make In India’ jong ka Sorkar Pdeng.

U Myntri u la ban jur ruh ia ka jingdonkam ban kyntiew ia ki mar tynrai, ka jingpynkhlain ia ka ioh ka kot ha man ki jaka ban poi sha ki kliar jong ka roi ka par. U Myntri u la pynkup burom ruh ia ka Meaidabahun Majaw na Shillong, kaba pule ha ka klas IV bad kaba la sain dur ia ka ‘anti-bullying’ app ba lah ban pyndonkam lyngba ki mobile.

Ha ka jingkren jong u ha kane ka sngi, u Bah Lahkmen Rymbui u la ong ba ka Sorkar Meghalaya ka la kut jingmut ban kyntiew ia ki kam pule ha ka jylla bad u la ai ka jingsngew nguh ia ka Sorkar Pdeng kaba la kyrshan ia ki kam ba la sdang da ka Sorkar Jylla. U Vice Chancellor ka NEHU ruh u la pynsngew ia la ka jingsngew nguh sha u Myntri Sorkar Pdeng uba la kyrshan ia ki prokram ba la sdang ha kane ka skul bah.

Hadien kane ka jingplie pyrda, u Myntri Sorkar Pdeng bad u Myntri ka Sorkar Meghalaya ba dei peit ia ki kam pule ki la iashim bynta ha katto katne ki jingialang bad ki ophisar ka tnat pule jong ka jylla bad ki nongpyniaid jong katto katne ki skul ka jylla ban iakren shaphang ka jingpyntreikam ia katto katne ki skhim bad ki projek.

What Next?

Recent Articles

Leave a Reply

Submit Comment

*