Ka NEIGRIHMS kan sa plie noh ia ka jaka pule doktor ha kaba ia dei bad ki bniat: Dr. Thappa

Shillong, Nailar 31: U Dr. D. M. Thappa u la shimti kum u Director jong ka NEIGRIHMS naduh u bnai Iaiong 2017 bad ka thong ban pynbha  shuh shuh ia ka jingshakri ha ka liang ka koit ka khia ha katei ka Hospital. Watla ki Director kiba mynshwa ki la leh bha ban pynpoi ia ka NEIGRIHMS haduh kumba ka long mynta, u Director ba mynta u la ban khia ban pynbha shuh shuh ha ka liang jingwad bniang (research), Faculty Development Programme, ban pynbha ia ki Kor ki bor bad  na bynta ka jingbhalang ki nongtrei.

Naduh u snem 2017-18 la bun ki jingialang bad ki jinghikai la pynlong hapoh kane ka hospital sorkar ia kaba la tip kumka “Continuing Medical Education” bad ki ki jingialang ba la pynlong da ki tnad bapher bapher. Ban jer kyrteng katto katne – ki workshop halor ka Bioethics, good clinical practices, research methodology bad ki National conference ba la pynlong da ka tnad Pathology bad Dermatology. La ai mynsiem ruh ia khynnah pule MBBS ban pynpaw pyrthei lyngba ki conference bad kane ka la urlong  lyngba ka UGCON ba nyngkong eh ba la pynlong ha NEIGRIHMS ha 17 -19 tarik u Nailar 2018.

Ban pynkhlain shuh shuh ha ka liang ka jingwadbniah ha NEIGRIHMS, la seng ia ka tnad research ha ka sien nyngkong ha u snem 2017. Ia ka Ethical Committee jong katei ka hospital la ithuh da ka Drug Controller General jong ka India da ka jingiaitrei minot jong ka tnad research ha u snem 2017.

Da kane ka jingithuh ia ka Ethical Committee, ia ki ‘clinal trials’ la lah ban pyniaid shaphrang ha NEIGRIHMS khnang ban iarap ban pynpaw khmat ia ka jingtih bniah jong ka Hospital ha ki snem ban dang wan. Ka ‘animal ethics’ ruh lah pynthymmai ha kajuh ka por. Ka Anti Retroviral Therapy (ART) center, ka bym shym don baroh shi katta ha NEIGRIHMS, la seng thymmai ban ai jingsumar sha ki briew kiba ioh HIV. Ki ICTC ka IRL lab ruh ki ioh ka NAC accreditation.

Ka ‘centralised gas manifold’ kaba long kaba kongsan bha na bynta ka hospital kum ka NEIGRIHMS, hynrei na katto katne ki daw , ym shim la don naduh ba la seng ia ka Hospital.Ka don ka jingartatien ba ioh duna ka jingdon ki tyndong Oxygen namar ban pyndap ia ki tyndong oxygen lah leh beit shaduh Guwahati. Ka jingtrei shitom ka la seisoh namar ka Centralised Oxygen supply bad kiwei pat ki lyer ka lah sdang. Ka centralised gas manifold ha NEIGRIHMS kan sa urlong shisha ha ki sngi ban wan.

Namar ka jingiar bad jingpeit jngai jong ka Engineering wing jong  ka Hospital hapoh ka jingkhmih jong u Deputy Director Administration, ka jingtei ia ka Medical College Building, ka Nursing College building, ka Research Cancer center bad ka hostel na ka bynta ki khynnah ka la iaid shaid shaid kat kum ka por ba lah buh.

Ka jingsdang ban tei ia kine ki iing mala lah sdang naduh u Lber 2017 bad 40 na ka 100 la dep ia ka jingtei ia ka Medical College bad Regional cancer center bad la khmih lynti ban dep shwa u Risaw 2019. Ia ka Nursing College la pyndep palat  60 na ka 100 bad la khmih lynti ban pyndep mynta u snem hi. Ka jingpynheh bad  jingpyniar ia ki kor ki bor bad ki jingtei ia ki iing mala kan iarap shibun ban pynbha shuh shuh ia ka jingaisumar ia ki nongpang khamtam eh ka Regional Cancer center kan long ka jingmyntoi ia ki nongpang jong kane ka thain kiba pang ia kane jingpang bampong, kiba hap ban leit sha jngai ban sumar.

Ki bor pyniaid  jong kane ka Hospital ka pynlong ka jingiakynduh barobor bad ki agency kiba shim ia kitei ki projek ban shna  khnang ban pyntikna ba kin pyndep bad aiti ha ka por kaba lah buh. Kane ka Hospital ruh ka lah iaid sha khmat ban ioh jaka shuh shuh ban pyniar  ia ka jingaishakri jong ka bad ka la jan urlong ruh kane ka jingthmu. Da kaba ioh jaka shuh shuh , ki deing pynkiang kiba bun kin sa jah. Ka skul paramedical  bad ka Dental College ruh yn don ha kane ka jaka.

Ka jingthmu ban ithuh noh ia kiba bun ki MD courses ki nang urlong kawei hadien kawei bad mynta u snem ar tylli ki Department, kata ka Radio-diagnosis bad ka Pathology ki lah ioh ka jingithuh(recognition) na ka MCI. Kane ka kynthup lang ia kiwei  pat ki course kiba lah ithuh da ka MCI. Ka jingpyrshang ban ioh jingithuh MD prokram ha kiwei pat ki Department ka la nang iaid shakhmat bad ki bor pyniaid jong kane ka Hospital kan ym shong thait tad haduh ban ioh ka jingithuh da ka MCI ia ki degree jong kiwei pat ki course ha NEIGRIHMS.

Don ruh  ki Department kiba don ha ka lynti ban sdang ki MD/MS programmes ha ki sngi ban sa wan – ENT Department, Forensic Medicine department bad  Dermatology department. Hadien kine pat, ka department Ophthalmology, Pharmacolgy bad Community Medicine. Ki don katto katne ki  jingthut hangne hangtai ban ioh ka jingthuh na ka MCI bad ban sdang ia ki Post-graduate programmes namar yn peit thuh bha thik pa thik.

Ka interbiew na ka bynta ki nongtrei lah pynlong ha ka 1 tarik bad 2 tarik u bnai Jymmang 2018 ban pyndap ia ki post ba thylli ha ki department ba pher ba pher bad ka jingpdiang jong ka Selection Committee ha kane ka liang kan ym slem shuh. Ka jingai jingmut jong ka 7th Pay Commission na ka bynta ki nongtrei lah pdiang ha kane ka Hospital bad ki nongtrei ki ioh tulop kat kum ka 7th Pay Commision naduh u bnai Naitung. Ka skhim jingpeit bniah na ka bynta ka jingkiew kyrdan, ka bym shim la pynlong ha ki snem ba lah dep, lah nang beh bad lada ka long kumba la khmih lynti, kane ka jingdawa ba la slem bha jong ki nongtrei yn pynbeit noh.

 

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet