Shillong, Rymphang 18: Ka kynhun ki samla pule jong ka North East Students’ Organisation (NESO) kaba kynthup ia ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad All Arunachal Pradesh Students’ Union (AAPSU) ki seng samla pule jong ka dong shatei lam mih ngi mynta ka sngi kala iohi ia ka jingkren jong u president ka party BJP u Amit Shah ha ka jingwan jong u sha Assam.
Ha ka jingkren ka jong u tei u nongialam rangbah ka BJP u la ong ba lada ka BJP ka wan biang ha ka bor kin wan rah biang ia ka Citizenship (Amendment) Bill. Haba ia dei bad kane na ka liang jong ka NESO ka pynrem jur ia une u nongialam ka BJP bad kane ka jingkren ka long kumba niewbein ia ka jingiakhih ki briew kane ka thain ia ka CAB. Ka jingiakhih ha kane ka thain pyrshah ia kane ka Bill ka la pynlong ia ka sorkar pdeng ba kan nym lah ban wanrah ia kane ka Bill hapoh Rajya Sabha ha kane ka iing dorbar kaba dang shu dep.
Ka NESO ka ong ruh ba kane ka jingkren ka paw shaikdar ba kine ki briew kim don ka jingsngew ia ki briew kane ka thain bad ka jingsngew ki rit paid jong ka Dong shatei lam mih ngi jong ka Ri India, na kane ka jingkren ka paw ba ki kwah ban pynkylla rit paid da kaba wanrah ia ki briew na Bangladesh ban pynurlong ia kane jingkwah ban pynkylla Hindu ia kane ka Ri. Na ka liang jong ka NESO ka pyrshah jur ia jingwan nong Bangladesh bad ka jingpyrshah jong ki ka long ba kim shym pyniapher la ki dei ki Hindu ne ki Muslim, ki pyrshah ia ki nong Bangladesh.
Na ka liang jong ka NESO ka phah ia kane ka khubor kaba shai kdar sha u nongialam ka BJP, ym dei ba ki pyrshah ia u hynrei ki pyrshah ia kane ka Bill iakjakor bad kum ki rit paid kane ka dong shatei lam mih ngi jong ka Ri India da lei lei kin nym pdiang ia kane ka bill bad kin ieng pyrshah ia kane ka jingthmu ba sniew na ka bynta ban iada ia la ki jong ki jaidbynriew, ka rit dustur, ka ktien ka thyliej na ka bynta ki pateng ban dang wan, la ong u sharman ka NESO u bah Samuel Jyrwa ha ka khubor kaba la pynlait mynta ka sngi.
