Jowai, Nohprah 04: Ka seng AJYWO Central Body ka kyntu ia ka National Highway Authority of India (NHAI) bad ruh ia ka kompani, G.R Infrasture Ltd kaba la shim kontrak ha ka ban pyntrei ia u surok arliang NH 44 naduh Soomer WJHD haduh Malidor EJHD ban pynsted noh ha kaban pyntrei ia u tei ka surok na ka bynta ka bit ka biang jong ki paidbah nongleit nongwan lyngba jong utei u surok.
“ka Surok NH 44 ka dei u thied snam ba don kam tam ha ka leit ka wan ym tang ia ki nongshong jong ka jylla Meghalaya hynrei wat ia kiwei pat ki jylla jong ka thaiñ Shatei-Lam-Mihngi jong ka Ri India, hynrei kat kum ba ka long mynta ka jingpyntrei ia kane ka surok da kompani GR Infrasture Ltd, ka suki palat bad kane ka lah ban pynslem ia ka jingpyndep trei noh ia katei ka surok hapoh ka por ba la buh bad lada kane kan jia, kane kan sa ktah bha ia ka leit ka wan jong u paidbah”, ong u Bah M.H Dkhar President jong ka AJYWO Central Body.
Ka AJYWO ka kyntu ruh ka G.R Infrastructure Ltd ba ka dei ban pynkloi kat ba lah ha ka ban pynsted ia ki jingtap rong iong noh ia kito ki jaka ba la khlaw noh ia ka rong iong barim jong kane ka surok khnang ba ka jaboh pum-pum kaba mih na kaba khlaw noh ia katei ka syrtap ba ha jrong jong ka katei ka surok kan ym ktah ia ka koit ka khiah jong u paidbah naduh kito kiba don iing harud surok bad ruh kumjuh ia ki paidbah nongleit nongwan lyngba jong utei u surok.
Ha kajuh ka por ruh ka seng ka kyntu ruh ia ka GF Infrasture Ltd ban maramot artad ia baroh ki bynta ba la long thliew bad ruh sniew palat ha baroh shilyntrei jong u tei u surok khnang ban pynsuk ia ka leit ka wan jong u paidbah lyngba jong utei u surok katba ka jingtrei ia utei u surok ka dang iaid sha khmat.
Ka AJYWO Central Body ka kyntu ruh ia ka National Highway Authority of India (NHAI) bad ruh ia ki bor District jong ka Jaintia Hills bad kiwei kiwei ruh ki bor ba dei peit halor kane ka jingpyntrei ia kane ka surok ban pynsted noh ban leh ia kaba donkam baroh na ka bynta ban pynsted ia ka jingpyntrei ia ka surok na ka bynta ka bit ka biang jong u paidbah.
