Shillong, Nailur 11: Ka national president jong ka kynhun ki samla jong ka party NPP kala wan sha Meghalaya mynta ka sngi bad ha ka jingkren ka jong ka kala ong ba na ki party kiba don ha kane ka dong shatei lam mih ngi jong ka Ri India dei tang ka NPP kaba la mih na kane kane ka thain bad kaba sngewthuh ia ki jingeh jong ki paidbah.
Haba kren ha ki lad pathai khubor mynta ka sngi ha ophis trei kam jong ka seng NPP kaba don ha Lawchimier, kala ong ba kum ka briew kaba wan na ka rukom trei kam ban peit ia ka hok long briew man briew ban rung sha ka sian pyrthei ka iapher ha ka rukom pyrkhat pyrdain, ka jingkloi jong ka ban pdiang ia kane ka kam national youth president hapoh jong ka NPP ka long ba ka iohi dei tang ka NPP kaba sngewthuh ia ka North East.
Haba jubab ia ki jingkylli kala ong ba ka jingeh kaba ka dong shatei lam mih ngi baroh kawei ka ia kynduh ka dei ka jingbym ioh kam ioh jam, kane ka dei ka jingeh kaba baroh ki jylla ki ia kynduh mynta, kum ka president jong ka shnat ki samla na kane ka seng NPP, kan ia leh ban wanrah ia ka jingkylla ha ka pule puthi bad ka rukom pule ka dei ban long ka jingpule kaba ia hap dur ba ka kam kaba u ne ka khynnah ka kwah ban trei ia kaba la tip kum kata ka Skill development.
Haba phai sha ka sain pyrthei ha kane ka jylla kala ong ba ki paidbah ka jylla mynta ki phai khmat sha ka seng NPP ba kan long ka nongmih bujli ia ka seng Congress. Ha kane ka jingwan jong ka sha kane ka jylla ka long ban ia kynduh ia ki samla bad ban pynsngewthuh ia ki namar ka NPP ka shaniah ia ka jingkylla ha ka tyrpeng jong ki samla.
