Shillong, Nailar 5: u Bah Lakhmen Rymbui u ba dei u myntri ba dei peit ia ka tnad pule puhti jong ka sorkar jylla u ba dei na ka party UDP u la ong ba ha duh mynta kam pat don kano kano ka jingiakren ha kaba ia dei bad ka kam speaker hapoh jong ka party.
U la ong ba ka long ka jingduh kaba khraw ia ka party bad kum juh ia ka jylla baroh kawei da ka jingkhlad noh u Dr Donkupar Roy u ba dei u president jong ka party bad kum juh u speaker jong ka iing dorbar thawain ka jylla na ka party UDP.
Haba la kylli hato u long ne em ba la kloi ban shimti ia ka kam speaker lada ka party ka tyrwa, na ka liang jong u Bah Rymbui u la ong ba ia kata yn nym lah ban kren ie ei namar ia kane ka kam hap ban ia kren hapoh jong ka Parliamentary party jong ka party UDP.
Haba ia dei bad ka jingialang jong ka PP jong ka party UDP u la ong ba haduh mynta kim pat ia buh sngi, hynrei kaei kaba u kwah ka long ba kane ka sorkar ka dei ban neh san snem haduh ba kut jong kane ka por.
La iathuh ba ha kine ki shisnem shiteng kane ka sorkar MDA kala pynibun ki kam hapoh ka jingialam jong u Conrad K Sangma kum u myntri rangbah, u kwah ia ka sorkar kaba skhem na ka bynta ki kam pynroi hapoh jong ka jylla baroh kawei.
