Shillong, Nauilur 28: Ka Peop
le’s Democratic Front, ha ka jingiaid lynti jong ka ban pynkhreh ban sei ia ki kyrtong sha ka lympung Election MLA 2018 bad ban thaw ruh ia ki Committee bapher bapher ha kylleng ki Constituency, ha ka 28 tarik u Nailur ka la pdiang burom ia u bah Judah JM Wahlang kum u dkhot bad u kyrtong ba pura jong kane ka Party na ka Sohiong Constituency.
U Bah Judah JM Wahlang u dei ruh u khun ba heh duh jong u riew rangbah ba paw khmat ha ka jylla u Rev PBM Basaiawmoit uba la ju iakhun ruh ia ki Election sha ka iing Dorbar Thaw-Ain ka Lok Sabha ha ki snem kiba la dep. U Bah Judah JM Wahlang u wan pyniasnoh sha ka People’s Democratic Front ha ryngkat ka jingwan ia synran lang u kpa jong u hi u Rev PBM Basaiawmoit, ka kmie jong u, ki kni, ki meinah meisan lem ryngkat ki paidbah nongkyrshan jong u na kylleng ki dong bad shnong jong ka Constituency ha ka jingialang kaba la pynlong ha ka shnong Nongbsap.
Kane ka jingwan pyniasnoh u Bah Judah JM Wahlang la pdiang burom da u President ka PDF State Executive Committee u Bah Ivanlumlang Marbaniang ha ka jingiadon lang u Bah James Ban Basaiawmoit lem bad ki nongkit kam jong ka seng.Ha kane ka sngi wat hapdeng ka jingslap jong ka suin-bneng ki paidbah ki la wan ban ia donlang ban sakhi ia ka jingthaw ia ka PDF Zonal Committee Sohiong Constituency ha kaba la thung ruh ia ki nongkitkam.
Ha kane ka jingialang kiba la kren ki long u Rev PBM Basaiawmoit, u kpa jong u Judah nalor kiwei ki nongshong shnong kiba la ai jingkren kiba la kdew ia ki jingeh kiba la kynduh bad iohi ha ki snem ki ba la dep hapoh ka jingialam u Bah HDR Lyngdoh u ba dei u Myntri ba dei peit ia ka tnad kam poh iing ka jylla bad ki ba la pynpaw ba ki la donkam ia ka jingkylla.
U Bah Hamlet Dohling haba ai jingkren u la pynpaw ba ha ki shnong kiba hap ha Mylliem Constituency kaba un iakhun ha kane ka Election ban wan u la pynpaw ba ka Sorkar MUA II ha ka jingialam ka Congress ka la pyrshang ban pynrung ki shnong ki thaw hapoh ka jingpeit ka Meghalaya Urban Development Authority bad lada kan iohlad kan wanrah jingeh ia u paidbah ha bun ki liang.
“Ka UDP ka dei ka party tieng -eit bad namar ba ka tieng ka hap ban ia teh lok bad ka HSPDP ban iakhun ia ka Election MLA 2018″, la kynthoh u Bah Hamlet ha kaba ia dei bad ka jingiateh lok ka UDP-HSPDP. U Bah Aibor L Nonglait haba ai jingkren u la ong ba ba ka sorkar ka la thaw ia ki ain ban khniot bein ia ki paidbah kum ha kaba ia dei bad ka jingbym don ki lynti treikam kiba biang kum ha ka rep ka riang bad kiwei pat ki jait jingtrei ki ban pynim ja ia u paidbah.
Ha ka jingkren jong u Bah Judah u la ong b”Ngam kwah ban thong ia u paidbah bad ngam kwah ba u paidbah ba un thong ia nga na ka bynta ban iakhun Election”. u la ong ba kan don jingpher aiu ba un wan ban wan mih khmat na ka bynta ka Sohiong Constituency lada u dei na ka shnong Mawpat ha ba bun na ki MLA ki dei na kiwei ki shnong hynrei ki mih khmat ia kiwei pat ki Constituency.
