Jowai, Jylliew 25: Hadein ka jingud jingnam jong ki nongshong shnong ka shnong Namdong sha ka Seng halor ba bun ki jingduna haba iadei bad ka jingtreikam ka Primary Health Centre ba don hapoh ka shnong Namdong ,kumta ka KSU Namdong Unit mynnin ka 24 tarik Jylliew 2020 hapoh ka jingialam U President ka KSU Namdong Unit Samla Chanbor War.
Ha kane ka jingleit la don lang ruh u President ka KSU Jantia Hills District Unit Samla Ohibait Dkhar lem bad ki dkhot ka District bad ka Unit ruh kumjuh, la ioh ban kynduh ia U Doctor in-charge, U Dr D. Suchiang bad i CHO Kong Inspire Pohktai, naka bynta ban pynsngew iaka jingeh jong ki paidbah.
Ha ka jingiakren bad kine ki arngut ki khlieh jong ka PHC, la ioh ban iatai sani bad ia mir jingmut bha ha kaba iadei bad ki jingduna jong kane ka PHC bad ruh na bynta ban iakren iatei lang kumno ban pynbha shuh shuh.
Ka seng haka jingiakren bad ka Doctor ba dei peit ia kane ka jaka sumar ka la pynpaw ruh ba ki paidbah jong ka thaiñ hi ki lah angnud ban ioh noh lane pynkiew kyrdan (Upgrade noh) iaka PHC Namdong sha ka Community Health Centre ha kaba kan wanrah jingmyntoi shibun iaki paid nongshong shnong jong katei ka thaiñ.
Lada lah ban ioh ia ka kyrdan CHC ka jingmyntoi ym tang ia ka shnong Namdong hynrei wat ia ki shnong ba syndah bad ka shnong Namdong bad ki thaiñ border. Katkum ka Population Census kaba long kawei naki jingdonkam (criteria) ban ioh iaka kyrdan CHC, ka PHC Namdong ka lah long kaba biang palat ban ioh iakatei ka kyrdan.
Wat naka liang u Doctor Incharge u la kubur ba lah dei shisha ban ioh iaka CHC katkum ka jingbun u paidbah nong shongshnong ka thaiñ. Ka Seng halor kane ka mat ka la rai ban iai buddein ban ban shim ki lad ki lynti naka bynta ban pynioh lane pynkiew iaka PHC sha ka kyrdan CHC.
Haba phai pat sha ka jingduna jong ka Human Resource lane ka jingduna ki staff ban iarap hakane ka PHC, Ka Seng ka dap daka jing sngewlynngoh ban tip ba tang uwei u Doctor ban kitkhlieh iaki jingdonkam baroh khamtam haba bun u paidbah ba wan shim dawai, bad kane ka lah ban pynlong kawei na ki daw ka jingdkoh treikam jong katei ka PHC namar ban shakri marwei kam dei shisha kaba suk.
Halor kane ka mat ka Seng ka la rai ban shim iaki lad ki lynti ban thung biang sa uwei u Doctor Incharge ban iarap lang khnang ban ym don ka jingdkoh ban khamt kan pynsting ruh iaka rukom treikam haba iadei bad ka koit ka khiah namar kane kadei ka kam iap kam im u Paidbah.
Haba phai pat sha ki Ambulance, ka Seng ka la lap ba umdon shisha ka Ambulance ba pura ban kit iaki nongpang hakano kano ka por sha kiwei pat ki Hospital bad kane kan buh jingeh iaki paidbah haba ki don ki Emergency Case khamtam ha ka por miet kapor iong.
Haka jingiakren ka Seng bad ki nongpeit iaka PHC la lap ba ka don ka Ambulance hakatei hynrei kam don pat iaki jingdonkam hapoh kum ki Oxygen ki tiar kiban iarap iaki nongpang haka jingiaid lynti, bad na ka liang ka Seng ka buh ka jingkyrpad sha ka sorkar ban pynbiang mardor iaka Ambulance khnang ba kan long ka jingmyntoi ia u paidbah hi baroh.
Haba phai pat sha ki Pharmacist lane ki nong ai dawai iaki paidbah la lap bym don satia iwei ruh i nongaidawai ha kane ka PHC bad kane ka buh jingeh iaki ba bun ba shim dawai.
Ka seng shuh shuh haka jingiakren bad u Doctor la lap bad sngewlyngngoh ba bun ki paid nongshong shnong ka thaiñ ki don ka jingtieng haki wat ban wan Injection lane ban shim dawai ruh.
Na ka liang ka KSU Namdong Unit lyngba u Samla Chanbor War u la kyntu iaki paidbah ba kim dei ban tieng ban leit sha PHC namar la buh iaka ban myntoi ia u paidbah hi bad la kyrpad ba kin iajan bad ka PHC khnang ba kan nym buh jingeh iaki hi bad ban ioh kita ki lad jingiarap na ka sorkar kiba ki dei hok ban ioh.
Ka seng halor kine ki mat ka kyntu jur sha ki bor ba halor ban khmih lang sha kine ki thaiñ na bynta ka jingmyntoi u paidbah bad ka Seng kan iaid buddien ruh ha ki sngi kiban wan iakine ki jingeh jong ki paidbah ka thaiñ bad ruh kan sa iashong pyrkhat biang ruh kumno ban shim ki lad ki lynti ban pynbit pynbiang iaki jingdonkam haka kane ka PHC ha Namdong. Ka seng lyngba kane ka kyrwoh ka la pyntip ba kan iai bteng ban trei na bynta u paidbah khamtam ia u duk u suk ha ki liang baroh.
