Shillong, Lber 23: U myntri rangbah jong ka jylla u Conrad K Sangma haba jubab ia ka jingkylli bynrap jong u Bah Himalaya M Shangpliang MLA jong ka Mawsynram, u la ong ba ka pisa kadei na ka SPV jong ka Lafarge Cement ka don sah kut palat ia ka shispah klur kaba khlem pat pyndon kam.
Na ka liang jong u myntri rangbah ka jylla u la ong ba na ka liang jong ka sorkar kala shong jingialang ban ia kren kumno ban weng ia ki jingeh ha kaba ia dei bad ka jingpyndon kam ia ka pisa laba dei na ka SPV jong ka Lafarge Cement. Na ka liang jong u Myntri rangbah u la ong ba ka sorkar kan wad ki lad ki lynti ban weng ia kane ka jingeh.
Na ka liang jong u MLA jong ka Mawsynram u wanrah ia kane ka jingkylli ha kaba ia dei bad ki skhim sam sam sha ka thain Mawsynram kiba dei na ka SPV, haba jubab ia kane ka jingkylli na ka liang jong u myntri ba dei peit ia ka tnad sam um u Bah Samlin Malngiang u la ong ba ka jingpeit bniah ka dang don hapoh jong ka Meghalaya Basin Development Authority.
Haba ioh sngew ia kane ka jubab na ka liang jong u MLA ka Mawsynram u la ong ba ki shnong kiba hap hapoh jong ka SPV ki don haduh 54 tylli bad kine ki hap ruh hapoh jong ka jaka kaba u shongknor jong ka iing dorbar u mihkhmat.
