Tura, Nohprah 07: U myntri rangbah ka jylla u Cornad Sangma mynta ka sngi u la lam ia ki “Tablet” sha ki samla pule ha Tura naka bynta ki Class XII hapoh jong ka Tura Government College Auditorium ha ka jingiadon lang bun ki riew rangbah bad ki nonghikai jong ka kolej.
Ha ka jingkren jong u Cornad ha kane ka jingsam ia ki “Tablet” u la kyntu ia ki samla pule ba ka por ka dei kaba kongsan tam ha ka jingim briew bad shisien ba ka por kala leit kan nym wan phai shuh, kaei kaba ka sorkar ka lah ban leh ka long ban btin lynti ia ki khun samla ba kin kiew sha phrang.
Ha kane ka sngi u la bethah ia ki samla pule ba kin don ia ka thong ka jong ki ha ka jingim briew khnang ba kin lah ban kiew ha ka jingim ka jong ki bad ba kin long ki briew kiba lah ban leh bun kiei kiei na ka bynta ka jylla. U la ong ba ki samla pule kin pyndon kam ia kine ki “Tablet” na ka bynta ka jingmyntoi ha ka jingpule jong ki.
Ia kine ki “Tablet” kiba la sam sha ki samla pule ka dei na ka skhim ““Digital Learning Aid Scheme” jong u snem 2018-19 bad ki samla pule kiba la ioh ia kine ki tablet ki long haduh 4092 ngut na ki 48 tylli ki skul.
