Shillong, Lber 04: Iaka Executive Committee kaba thymmai jong ka Khasi Student’s Union (KSU) la pynbam smai myn
ta ka sngi ha U Soso Tham Auditorium bad ia kane la leh da u president ba laleit jong ka seng u bah Daniel Khyriam.
U samla Lambokstarwell Marngar ha dien ba la shimti ia ka kam president jong ka seng KSU u la ong ba, ka kam kaba ha khmat eh jong ka seng ka long ban peit ba ka jingpule bad ka ioh kam ioh jam jong ki samla ka long ka thong kaba ha khamt ba kaseng kan trei nangne sha khmat.
Ka por kala dei ba ka sorkar jylla ka dei ban wanrah ia ka policy kaba bit dor ha ka liang kapule puthi lem bad kiwei kiwei ki policy na ka bynta ka roi ka par jong ka jylla baroh kawei, ia kane u la kren ha ka por ba u shim smai kum u president ba thymmai jong ka seng samla pule.
La ong ba, ki kmie ki kpa kila ia leh shitom kat ba lah ban pynioh ia ki khun jong ki ia ka jingnang jingstad hynrei ki samla ha dien ba kila dep ia ka jingpule jong ki ki hap ban mad ia ki jingeh ha ka ioh kam ioh jam bad ka poi ka pud bad ki hap ban leit tied ia ka jingkhang jong ka iing bishar bad ki policy kiba don mynta kila buh ia ki samla pule ha ka jingeh kaba khraw.
Bun sien ki samla kiba la leh bha ha ki jingpule ha ka Class XII hynrei tang na ka daw jong ka jingduk kila hap ban pep noh ia ka jingpule ka jong ki namar ba kim don ki jaka pule kiba biang ha kane ka jylla ban ia nujor bad kiwei ki jylla. Ka seng kan sa dawa na ka sorkar jylla ban buh ia ki jaka pule ha baroh ki District ba ki samla pule kin ioh ban pyndep ia ka jingpule jong ki bad ba kin nym duh ia ka bhah ioh kam ioh jam ka jong ki.
Haba ia dei bad ki jaka ai jingsumar jong ka sorkar kum ki CHC bad ki PHC kiba bun kila kylla jaka ri masi bad ki kylla long ki jaka leh kam sniew kiba lai phew jaid. Ka por kala dei ba ka sorkar kam dei shuh ban dang shong kli kti ha kaba ia dei bad u pud u sam jong ka jylla.
