Shillong, Naiwieng 06: Ka jingiakilan met hapdeng ki shipai India bad ki shipai jong ka Ri Bangladesh ia kaba l
a tip kum ka “SAMPRITI” kane ka jingiakilan met ki shipai hapdeng kine ki ar tylli ki ri ka dei kaba juh pynlong man u snem bad ka jingthmu ka long ban wanrah ia ka jingiajan hapdeng ki shipai jong ka Ri India bad ka Bangladesh.
Kane ka jingiatreilang ka long ban ioh ia ka jinghikai kaba mar kylliang bad khamtam eh kumno ban ia khun pyrshah ia ki kam lehnoh namar kine ki ar tylli ki ri kila shah ktah na ki kam lehnoh kiba don ha ka Ri jong ki.
Kane ka jingiakilan met kaba mynta ka dei ka sien kaba hynniew ia kaba la pynlong ha pdeng kine ki ar tylli ki Ri bad ka long ka sien kaba nyngkong ia kaba la pynlong ha kud shipai ha Umroi ia kaba la sdang mynta ka sngi bad kan kut ha ka 11 tarik mynta u bnai hapoh jong ka kynhun shipai ia kaba la tip kum ka Red Horn.
Ia kane ka jinghikai ba kyrpang la plie mynta ka sngi da u Lt Gen AS Bedi YSM , VSM u ba dei u General Officer Commanding jong ka Gajraj Corps ha ka jingiadon lang u Major Gen PS Behl GOC Red Horns Division .
Ha ka jingkren jong u General Officer Commanding jong ka Gajraj Corps kum u kongsan u la pdiang sngewbha ia ka kynhun shipai jong ka Ri Bangladesh kaba la phah ia ki ba kin wan sha kane jingiakilan met lang. Ki shipai Bangladesh kiba la ki long 14 ngut bad ki shipai jong ka Ri India ki long 20 ngut.
Ha kane ka jingkren plie na ka liang jong u u Lt Gen AS Bedi YSM , VSM u ba dei u General Officer Commanding jong ka Gajraj Corps u la ong ba ka Ri India bad ka Ri Bangladesh ki sngewthuh ia ka jingkylla bad ka jingma na ki kam lehnoh, kine ki ar tylli ki ri kin ia trei lang ban ia khun pyrshah ia ki kam lehnoh.
