New Delhi, Nailur 19: Ka sorkar jong ka Ri Singapore kan buh ia ki jaka ai jinghikai ba kyrpang ha ka donngshatei lam mih ngi jong ka Ri India ha kaliang ka ioh kam ioh jam bad kane ka jaka ai jinghikai kan long ha Guwahati namar kan long ka jaka pdeng ia baroh ki jylla jong kane ka thain.
Kane ka long ka jingiamynjur ha dien ka jingiakren ha pdeng u myntri ba deipeit ia ka dong shatei lam mih ngi jong ka Ri India u Dr Jitendra Singh bad ka kynhun jong katei ka Ri ia kaba la ialam da u High Commissioner jong ka Singapore, u Lim Thuan Kuan.
Ha kane ka jingiakren na ka liang jong ka Ri India da u myntri khynnah ba deipeit ia ka NE u Dr Singh ha kaba la don lang ki heh sorkar. Ha kane ka jingiakren na ka liang jong ki heh ka Ri Singapore kila pynpaw ia ka jingkloi jong ki ban ia treilang bad ka Ri India lyngba ka sorkar Assam ha kaba ia kane ka jaka ai jinghikai kin buh ha Guwahati.
Ha kane ka jingialang na ka liang jong u myntri khynnah jong ka sorkar India u la pynpaw ba ka Ri Singapore bad ka Ri India ki long ki ar tylli kiba juh ia treilang ha ki ba bun ki liang bad ka jingwan jong u Deputy Prime Minister dangshen jong katei ka Ri sha India kala dang pynkhlain shuh shuh ia ka jingiajan ha pdeng kine ki ar tylli ki Ri.
