Jowai, Naitung 20: Ka NABARD (National Bank for Agriculture and Rural Development) haka jingiatreilang bad ka SURE (Society for Urban and Rural Empowerment) kala plie ia ka dukan ki nongrep ha Iawmusiangban Jowai. Kane ka dukan ka dei naka bynta ki nongrep hapoh ka West Jaintia Hills kiba don hapoh ki SHG kin ioh die ia ki mar ki mata jong ki; kiba pynmih. Ia kane ka dukan la plie mynta ka sngi haka Kyndiah Market kaba don ha Kiang Nangbah Road, Iawmusiang ha ka lynti ban leit na Iawmusiang sha Tpepale.
Ha ka jingkren lamkhmat u ma Kobarnes Tlang uba la nongpyniaid iaka jingialang ula ong ba kane ka dukan ka long kum ka rynsan bad ki nongrep kin ioh ban die ia ki jait tiar kiba ki pynmih. Ula iaroh ia u ka NABARD khamtam ia u T.Thangkhiew uba long u District development Manager jong ka NABARD uba la trei shitom ban pynurlong ia kane ka jingthrang jong ki nongrep da kaba wan rah ia kane ka skhim ha Jowai, West Jaintia hills.
U H.H. Mohrmen uba long u nongialam jong ka SURE haka lamkhmat jong u; ula iathuh ba kane ka Rural Mart ka dei kaba la seng ha ka kyrteng jong ki nongthaw khiew ranei kiba naka shnong Tyrshang, hynrei namar ba ka SURE ka don sanphew tylli ki SHG bad artylli ki Famers’ Producer Organaisation (FPO) kiba kala iarap bad kumjuh ruh kiba pynmih bun ki mar ki mata, u DDM ka NABARD ha ryngkat ki nongpyniaid ka NABARD kila mynjur ban buh ruh ia ki mar kiba pynmih da kiwei pat ki SHG ruh kiba ka SURE kala kseng lyngba ka jingkyrshan ka NABARD.
U F.R. Marak uba long ruh u General Manager jong ka NABARD Regional Office, Shillong ha ka jingkren jong u; ula iathuh ba ka NBARD kala pyntreikam bun ki project hapoh West Jaintia hills, kum ka Financial Literacy Campaign (FLC), ka SHPI kaba seng ki SHG, ka POPI kaba seng bad kyrshan ia ki FPO, ka Rural hat bad mynta kala plie ia kane ka Rural Mart lyngba ka jingkyrshan jong ka SURE. Ula ong ruh ba mysnhuwa ki nongrep ki shem shitom ban pyniaid iew ia ki mar kiba ki pynmih khamtam (kito ki bym pyut) hynrei mynta u khmih lynti ba kane ka Rural Mart kan iarap ia kito kiba pynmih ia ki mar kiba la song bha (pack) ba kin buh ha kane ka dukan.
Haka jingkren jong u; u Marak ula iathuh ruh ba ka NABARD kan siew ka bai wai bad ka jingsiew ia u ne ka nongshong dukan naka bynta ar snem. Ula ong ruh ba u sngewkmen ba kane ka dei ka sien kaba nyngkong ba ka ophis jong ki; kala ioh ban plie ia kiba kum kine ki projek hapoh ka jylla Meghalaya hi baroh kawei.
Ka kong B. Blah, BDO Thadlaskein block ha ka jingkren jong ka kum ka kongsan ha kane ka jingialang kala iaroh nyngkong ia ka SURE bad ka NABARD kiba la lah ban sdang ia kane ka kam. Kala ai khublei ruh ia ki SHG bad ki FPO kiba la wan rah ia ki mar kiba ki pynmih ban ioh die ha kane ka dukan. Naka liang jong ka, ka kong Blah ka khmih lynti ba kane ka jingsdang kan nangheh nangsan bad ki nongrep hapoh ka District kin ioh jingmyntoi.
Ki tiar kiba lah ban ioh na kane ka dukan ki dei bun jait ki tiar bala thaw da ki nongthaw khiew ranei kiba lah ban pyndonkam bad kumjuh ban aisngewbha(gift item). Ki don ruh bunjait ki achar wat ki achar dohkha ruh, ki dohkha syang/kharang, ki tiar thain kti, ka umngap, ka umsoh, ki syntiew tyrkhong (dry flowers), ki soh bala pyntyrkhong (dry fruits), ki jain ba thain da ka kti bad kiba pynmih da ki SHG. Hangne lah ban ioh wat ki dawai khniang ruh na ka bynta ki nongrep.
Kiwei pat kiba la kren ha kane ka jingialang ki dei ka kong Milda Shylla na ka kynhun ki nongthawkhiew na Tyrshang, u Habadajop Lyngdoh bad u Raj Passah naka SURE bad ia ka jingialang la pyniaid da u ma Kobarnes Tlang uba long u President jong ka Seng Kynhun Nongrep hapoh ka Thadlaskein block.
