Shillong, Naitung 02: Ka Seiñ Kur Dkhar Jaintia Hills, Wapung Circle kan pynlong ia ka General Meeting jong ka, ha ka 06.07.2019, por 11:00AM, ha Community Hall (Iing Dorbar), Wapungshnong, East Jaintia Hills, na ka bynta ban pynskhem ia ki Nongkit Kam jong ka lem bad ka Jingjied ia ki Dkhot sha ka Executive Committee jong katei ka Seiñ Kur.
Nalor kata, katei ka Seiñ Kur Dkhar, kan sa ia kren ruh ia shibun ki mat ki ba iadei na ka bynta ka bha ka miat bad ka roi ka par jong ka Kur Dkhar, kaba hap hapoh ka jingkdup jong ka Seiñ Kur Dkhar Jaintia Hills, Wapung Circle.
Ha katei ka jingialang yn don lang ruh ki nongialam ba ha khmat jong ka Seiñ Kur Dkhar Jaintia Hills, East Zone ban pynskhem ia katei ka tnad trei kam bad ki nongkitkam jong ka bad ruh ban ai jingkren bad kyntu kynpham ha ka jingiadei bad ka bha ka miat jong ka Kur Dkhar hi baroh kawei ha kiba hap hapoh jong katei ka Circle bad ha Jaintia Hills ruh baroh kawei.
Kumta, ka Seiñ Kur Dkhar Jaintia Hills, Wapung Circle ka khot lang ia baroh ki Kur Dkhar kiba hap hapoh jong ka Seiñ Kur Dkhar Jaintia Hills, Wapung Circle ba kin iawan khlem pep sha katei ka General Meeting jong ka seng, khnang ba ka jingialang bad ki kam ki ban sa iai pynbeit kin long kaba iaid beit iaid ryntih bad ruh kaba phuh ba phieng na ka bynta ka jingmyntoi jong ka Kur Dkhar.
Kane ka long kat kum u kyrwoh khubor ba la pyllait da ki nongkitkam ba shipor (Adhoc) jong ka katei ka Seiñ Kur Dkhar, Jaintia Hills, Wapung Circle, kata, Shaniahskhem, President bad U Kyrshan Dkhar, General Secretary. Kane ka long katkum ka kyrwoh bala phah da u Bah Shaniahskhem Dkhar bad u bah Kyrshan Dkhar.
