Shillong, Nailur 20: Ka South East Khasi Hills District Demand Forum ka pynpaw ia ka jingsngewnguh ia ka jingkyrshan tylli kaba la ioh halor ka jingdawa ban kyntiew kyrdan ia ka Sohra Civil Sub-Division sha ka District ba pura.
Ka Forum ka pynpaw hangne ia ka jingsngewnguh ia ki khlieh nongsynshar, ki rangbah shnong, ki seng longkmie, ki seng samla, ki seng bhalang bapher bapher bad kumjuh ki riewkhmat ka thain Sohra bad Shella kiba la ia wan shim bynta ha ka jingialang bah kaba la long ha ka 8 tarik Nailur, 2018 ha Swami Vivekananda Hall, Ramakrishna Mission, Sohra na ka bynta ban pynpaw ia ka jingkyrshan jongki halor ka jingdawa district.
Shuh shuh, ka Forum shen kan sa leit ban ai ia ka dorkhas jingdawa sha u Myntri Rangbah ka Jylla, u Conrad K. Sangma na ka bynta kane ka jingdawa ban kyntiew kyrdan ia ka Sohra Civil Sub-Division sha ka District ba pura bad ruh ba ka jaka treikam jongka ka dei ban long ha Sohra, la ong u Bah John W Thabah Joint Secretary, South East Khasi Hills District Demand Forum ha ka kyrwoh mynta ka sngi.
