Ka Seng GSHSVA ka kloi ban iatreilang bad ki bor ka Sorkar ba iadei bad ki nongdie madan

Shillong, Kyllalyngkot 19: Ki nongialam bad dkhot jong ka Meghalaya and Greater Shillong Progressive Hawkers and Street Vendors Asssociation, kaba dei ka Seng ki nongdie madan hynne ka sngi ka 17 tarik kylla lyngkot 2020 ka la iakynduh ia U Chief Secretary  ka Jylla, U M.S Rao, ha ka karma treikam jong u ha Secretariat.

Ha kane ka jingiakynduh ka Seng ki nongdie madan ka la ai ia ka dorkhas bad pynkynmaw ruh ia ki dorkhas bad ki jingthoh kiba bun kiba kum ka Seng ka la ai sha ka Sorkar Jylla bad ki tnat treikam jong ka halor ki jingdawa jong ka Seng naduh ka snem 2016.

Ha kane ka jingiakynduh kaba mynne ka sngi la ioh ban iakren halor ki mat ki jura kiba pher kiba iadei bad ki nongdie madan. La iati ia ka dorkhas ha U Chief Secretary bad ka Seng ka la ioh ruh ban iakren bad u halor ka dorkhas. Ki mat kiba kongsan kiba la buh ha ka dorkhas bad kiba ka Seng ka la ban jur ha ka jingiakren ki long:

Ban pynbna bad pyntreikam noh mardor ia ka Ain jong ka Sorkar India ne Sorkar pdeng kaba iadei bad ki nongdie jingdie ha madan bad rud lynti.

Ka Seng ka pynpaw ruh ia ka jinglong la kloi ban iatreilang bad ki bor ka Sorkar Jylla halor ki kam ba iadei bad ki nongdie madan khnang ban wanrah ia ka jingkhuid, jingkylluid bad jingitynnad ha ka Nongbah bad ka Jylla bad ha kajuh ka por pat ban iada bad kyntiew ia ka jingim bad kamai ja kpoh jong ki nongdie madan.

La pynkynmaw ruh ba ha ki por kiba la lah ka Seng ka la ju ia treilang bad ki bor Municipal bad Urban ka Sorkar Jylla tangba ka Seng ka pynpaw ruh ia ka jingsgew khia bad sngewsih ba kine ki tnat Sorkar bunsien ki kylla ktien bad kim ju bat ia ki rai bad jingiakut.

Ka Seng ka pynpaw ia ka jingsngew khia bad pynrem halor ka notis kaba la  pynmih da ka Town Vending Committee jong ka Municipal kaba kdew ia ki 12 tylli ki jaka ba ki nongdie madan ki lah ban die jingdie bad ba tang kita kiba la register bad ka Municipal ki lah ban shong die jingdie.

Halor kane ka Seng ka ban jur ba ki bor Municipal bad kiwei ki dei ban burom ia ka rai bad ban pynneh ia ki jaka die jingdie bad ia baroh ki nongdie madan kumba ki long tat haduh ban da rai da kumwei pat bad haduh ban da weng ia ki jingeh baroh.

Khatduh eh ka Seng ka sngewthuh shai bad sngewkhia ruh halor ki jingeh kiba ki nongshong shnong ki iakynduh, kum ka jingkyrduh kam, ka jingshah ban bein kiba duk ba rangli, ka jinglah shilliang ha ka ioh ka kot bad ka jingduk jingklyrduh tasam.

Ka Seng ka sngewthuh ruh ia ka jingkhapngiah hynrei kata pat kan ym long ka daw ba yn kyntait ne kyndang ia ki nongdie madan, ka Ain ruh kam shah ban leh kumta.  Hynrei ka Seng ka kloi ban iatreilang bad ka la dep ruh ban tyrwa sha ka Sorkar halor kumno ban weng ia ka jingkhapngiah.

Ka seng ka khot ka wer ruh ia ki paidbah, ki bor sorkar, dorbar shnong bad kiwei ban iatreilang ban weng ia ki jingeh kiba don mynta ha ka imlang sahlang naduh ka jingkyrduh kam ki khun samla haduh ban rat diengkhong ia ka jingduk. Ong ka kong Shane Thabah  General Secretary Meghalaya and Greater Shillong Hawkers and Street Vendors Association ha ka kyrwoh kaba la phah sha ki lat pathai khubor.

What Next?

Recent Articles

Leave a Reply

Submit Comment

*