Shillong, Lber 13: Ka jingialang kaba la khot da ka HYC bad ki rangbah shnong ban ia kren halor ka phang ba ia dei bad u Smart Meter, hynrei namar ka jingpoi duna ki dorbar shnong la hap ban pynsangeh, hynrei ka seng HYC kan dawa ban pyrshah ha kaba ia dei bad kane ka jingpyntrei kam ia ki smart meter.
U General Secretary ka seng HYC, u bah Roykupar Synrem haba kren ha ki lat pathai khubor u la iathuh ba ki dorbar shnong kiba la poi sha kane ka jingialang ki long ka Dorbar shnong Mawprem, Kynton Masar bad ka dorbar shnong Phudmuri, ngi la khmih lynti ia kiwei ruh ki dorbar shnong ban ia don lang, hynrei kila pyntip ba kim lah ban ia don namar la don lpa ki kam ba kila dep ban buh.
Haba ia dei bad kane ka jingkwah jong ka sorkar ban pyntrei kam ia ka smart meter hapoh ka jylla bad khamtam eh hapoh kane ka nongbah Shillong, kum ka seng HYC naduh ka sngi kaba nyngkong ka seng kala pynpaw ia ka jingpyrshah bad kila dep ruh ban buh da ka jingthoh ha khmat u myntri ba dei peit ia ki kam bording.
Ha ka jingthoh kaba ka seng kala ai sha u James K Sangma myntri kam bor ding ba u dei ban ai ka jingpynshai ha kaba ia dei bad kane ka jingpyntrei kam ia ka smart meter bad ban pynsangeh shuwa shipor kathaduh bay m pat ia shai la kan long ka jingduhnong ne ka jingiohnong ia ka jylla.
Ha kaba ia dei bad ka jingialang kaba la khot ban pynlong mynta ka sngi na ka liang jong ka seng kam shym la lah ban pynlong namar ka jingduna kiba wan, ha ka juh ka por na ka liang jong ka seng kan dawa ba dei ban pynsangeh shuwa ha kaba ia dei bad ka jingpyntrei kam ia kane ka smart meter.
Haba ia dei bad kane ka seng kala pynkhreh ia ki kot lyngkdop ban pynshai paidbah ia ka jingduhnong bad ka jingiohnong ia ki paidbah bad khamtam eh ia ka MeECL kaba la kit ram mynta, kaei kaba ka seng kam sngewthuh ba balie ka dor jong u Smart Meter kan poi haduh T.9444 tyngka, katba u myntri u la ong ba kan nym tam palat ia ka T.3400/-.
Haba ia dei bad ka jingpyndon kam ia kane ka Smart Meter, ka seng HYC ka dawa ba ka sorkar ka dei ban pynshai ha kaba ia dei bad kane ka jingpyndon kam namar kaba khatduh kan ktah hi ia ki paidbah kum ki nong pyndon kam ia ka bor ding eletrik ha ka jylla.
