Shillong, Iaiong 24: Ka Lum Jingthang Committee ka Seng Khasi Kmie Mawkhar, Shillong, mynta ka sngi Rynghep ka 24 tarik u ‘nai Ïaiong 2022, ka la lah ban pynlong ia ka jingpynkhuid paidbah ia u lum jingthang briew, ba don ha Jaiaw, Shillong.
Ka jingpynkhuid ka dei kawei na ki bynta kaba ka Lum Jingthang Committee, ka ju pyndep ia ka shi sien ha ka shi snem, ha kaba ki para riew seng ba kynthup ruh ia ki paid jong ka Seiñ Raij Shillong.
Ha kane ka sngi kila ia mih paidbah shriak ban wan ban pynkhuid ban pynsuba ia ki sawdong ki sawkun jong kane ka jaka ba kyntang, ka jaka kaba juh pyndep ia ka jingpynkhuid pynsuba ia ka met kaba sah jong ki para kur para kha, ha ka mei syiem ding ynda haba ki la khlad noh na kane ka sla pyrthei.
U kongsan ba la wan ban don lang ha kane ka sngi dei u Rangbah B.K Dey Sawian, (ba juh khot ieit ia u kum Bah Bijon) u Secretary barim ka sorkar kmie ba dei khmih ia ka tnat security bad uba dei artad u nongaibuit ka Seng Khasi Kmie, ryngkat ka jingiadon lang u rangbah Don Kupar Dkhar President Seng Khasi Kmie.
Ha kane ka sngi u MLA ka North Shillong Constituency u bah Adelbert Nongrum, u Rgh Hainess Marbaniang General Secretary ka Seng Khasi Kmie, ki dkhot nongkit kam ka Seiñ Raij Shillong, ki dkhot ka Jylli Pyrkhat Kam Seng Khasi, ki dkhot ka Seng Kynthei Seng Khasi Kmie ryngkat ki para kur para kha jong ka Seng Khasi bad Seiñ Raij Shillong.
Shwa ban sdang jong ka jingpynkhuid, u Rgh Don Kupar Dkhar, President Seng Khasi Kmie, u la shim ia ka bynta ban pynher ia ka lama jong ka Seng. Hadien kane, u Rangbah Skor Jala, Chairman ka Komiti U Tymmen U San Seng Khasi Kmie, u la pyndep ia ka bynta jong ka nguh ka dem ka shat ka kheiñ khnong ka bishar.
Haba kren kum u kongsan, u bah Bijon u ong ba ha kum kane ka por ba mynta, ka pyrthei hi shi tyllup ki la klet naka bynta ban pynkhuid ia ka mei mariang kampher lada dei ha ka liang ki lynti ki syngkien, ka um ka wah, ki jaka ban ia shong ia sah, katno tam lei lei ia kum kine ki lum ba kyntang.
La ong ba donkam ban ri ban sumar ban pynkhuid pynsuba, namar ym dei satia tang u lum ban pyndep ia ka lehniam ba khatduh ia ki para riew seng kiba la leit shakhmat ka dwar jong U Blei, hynrei, u la ieng ban pynkynmaw ba ka kamram jong baroh ka long ban peit bad ban sumar ia une u lum.
U Rangbah Bah Bijon, u pyrto ruh ia ka kam ba radbah ba ka Lum Jingthang Committee ka Seng Khasi Kmie, kaba la lah ha kaban wanrah ia ka jingitynnad bad pyniphuh iphieng ia une u lum niam, ba wat ki briew na kiwei pat ki ri ka pyrthei, haba ki wan poi ha kane ka jaka kim lah ban khlem da kyndit ba ha kum kane ka jaka ha pyrthei, don ka kynhun jaidbynriew kaba da don ia la ki lum ba kyrpang kiba kum kine.
U Bah Bijon, um klet ruh ia ka por ka jingwan ban don bynta ha kaban thung lem ia ki tynrai dieng ha kane ka jaka, kaba mynta jan 20 snem tam, ban iohi ba kine ki dieng mynta ki la san ha kane ka jaka, kaba nang wanrah shuh shuh ia ka jingitynnad ia kane ka jaka ba kyntang bad ia ki sawdong ki sawkun ki jong ka.
Ha kane ka sngi, ka Lum Jingthang Committee Seng Khasi Kmie, ka la ai sngewbha da ki syrnot sah kynmmaw sha ki para riew Seng kiba la mih shakhmat ban iarap ban noh ia u synñiang u bynhei sha kane kane ka shnat treikam ka Seng Khasi Kmie.
Ia ka jingialang baroh kawei la pyniaid ia ka da u dkhot ka komiti, Rgh J.S.R Syiemlieh bad ia ki kyntien ai khublei la ioh na u Rgh K.L Mawlong Secretary jong ka komiti, ia kaba la bynrap da ka pynkhuid paidbah ba la lam khmat da u kongsan, u MLA, President Seng Khasi, ki nongialam ka Seiñ Raij Shillong bad bud lang ki parakur parakha ka Seng Khasi bad Seiñ Raij, Shillong. Kane ka long kat kum ka kyrwoh na ka Lum Jingthang Committee Seng Khasi Kmie.
