Shillong, Risaw 03: U Bah Edward Kurbah General Secretary jong ka seng kur Mei-Sin Kurbah la phah da ka jignthoh sha ka KHADC halor ka jingpynkylla ia ka Khasi Custom and Lineage Act.
Ha kane jingthoh kaba la phah sha ka KHADC la ong ban a ka liang jong ka seng kur Ka Mei-Sin bad ki Khun jong ka, kata, ki Kpoh Majaw, Kurbah kynthup Rapsang Kurbah/Marbisu, Basaiawmoit kynthup Lyngwi, Syngkli kynthup Muktieh bad Be, Lyngdoh Peinlang, Khongji kynthup Khongwar bad Hynniewta kynthup Langpen, ngi la shim khia halor kane ka jingtyrwa pynbeit thymmai da kaba pynlong ka jingiaphylliew jingmut hapdeng jong ki.
Hynrei, ki sngewthuh ba kawei-pa-kawei ka Kpoh ka dei ban iatai, iaphylliew jingmut shynrang bad kynthei, samla bad rangbah namar ba kano kano kaba mih kan ktah pateng-la-pakit ia ki longdien, la kan dei kaba bha eh ne da kumwei bad, ban sa wanrah sha ka Seng Kur pyllun khnang ba kan long tang kawei ka sawar ban ia pynhap lang.
Ki sngewthuh ruh ba tang ka Seng Kur jong ki kan ym lah ben leh ei ei lymda baroh ki Seng Kur jong ka Bri U Hynniewtrep kin ia mynjur bad kubur tang halor kawei kata, ban pdiang bad pyntrei kam ia kaba la khreh pynlong ain riti ka KHADC lane ba kan neh kaba ki longshuwa manshuwa ki la buh bad pynlong riti naduh hyndai kulong kumah bad kaba dang neh haduh mynta mynne.
Kumta, kila ai por ia ki Kpoh ba kin ialum ialang noh ha la ka jong ka jong ka Kpoh ban shim pyrkhat bad ban pynpoi jingai jingmut sha ka Seng Kur pyllun shwa ban kut kane ka snem khnang ba ha U Kyllalyngkot lane ha U Rymphang jong ka snem 2019, ka Seng Kur baroh kawei kan ia kynduh ban pynmih tang kawei ka jingai jingmut.
Na long ba kila thoh ruh sha U CEM ka KHADC ban pan por la kumno kumno hynriew bnai bad ba ngin sa phah la ka jingshem bad jingai jingmut jong ki. Kumba ka paw, imat ba phi don jingthmu ban khot lang ia baroh ki Seng Kur ha U Risaw, 2018 ban ia mir jingmut halor ka phang.
Hynrei na ka liang jong ki kim ym pat lah ban ai kano kano ka jingmut katba kim pat ioh ktien na ki Kpoh bad ruh, kin ym pat lah ban phah nongmihkhmat lane nongai ktien ha kyrteng ka Seng Kur Ka Mei-Sin katba kim pat ioh iatai bad iathir shwa hapoh iing.
Nalor nangta, ka Dorbar ba shisien lai snem jong ka Seng Kur, kan long ha ka Sngi Saitjain, 27 tarik U Risaw, 2018 ha Sohra. Namarkata, na ka liang ka Seng Kur Ka Mei-Sin bad ki Khun jong Ka, Kin da sngewnguh lada phin sngewbha pynjlan por shwa, kumba ngi la buh da kaba pyrkhat ba donkam ka por kaba kylluid ban lum ban lang bad ban da iatai bha bin-pa-bin halor kane ka bynta, kumba la kdew sha khmat.