Shillong, Nailur 13: Ka Seng Samla Seng Khasi Seng Kmie Mawkhar, Shillong, ka pynbna iar sha baroh ki President bad Secretary jong ki Tnat Seng Samla Seng Khasi bapher bapher jong ka Bri u Hynniew Trep u Hynniew Skum ba kin ia poi sha ka Dorbar Pyllun jong ki Samla ka ban long hapoh ka Iing Skul jong ka Seng Khasi Higher Secondary School Jaiaw hajan Madan Weiking, Shillong ha ka 16 tarik u Nailur 2017 ka ban sdang naduh ka por 10 baje mynstep.
Da ka mynsiem kaba sngewkhia ka Seng Samla Seng Khasi Seng Kmie ka pyntip paidbah lyngba kane ka kyrwoh sha ki Tnat Seng Samla Seng Khasi jong baroh ka dong ka thaiñ ka Ri bad ka Jaidbynriew ban iapoi sha katei ka jingialang kumba la pynkhreh na ka bynta ban wanrah ia ka jylli treikam kaba iar bad kham janai shuh shuh hapdeng ka jingtyllun sted jong ka por bad ruh na bynta ki kam kiba bun kiba long ki daw bah jong ka Ri bad ka jaidbynriew Khasi ha kaba iadei bad la ka jong ka Niam ka Rukom kumba la pynkup lyngba ki Riti Dustur.