Shillong, Jymmang 24: Mynta ka sngi ha ka por 2.30 baje ei ei mynstep na ka daw jong ka jingjur jong u slap baroh shimiet ka um na ka wah Umngi kala khlong shuh shuh ia ka khynew kaba hap ha ka shnong Balat jong ka South West Khasi Hills District.
Haba kren ha u SP News Agency, ki trai shnong na Balat kila iathuh ba ka um kala khlong ia ka khyndew haduh syndah ba don ki iing briew bad kane kala pynshong syier ia ki briew kiba shong ba sah ha shnong Balat.
Ka jingkhlong ka um na kane ka wah Umngi ia ka shnong Balat ka long man la u snem ha ka por lyiur bad bun na ki briew kila phet shnong na Balat naduh kine ki snem kiba la leit bad kane ka jingphet shnong jong ki briew kan dang iaid beteng lada ka sorkar kam leh ei ei ban shna ia ka kynroh ba iada na ka jingkhlong jong ka Um.
Ban pynkynmaw ha ka por ba u bah Vincent H Pala u long u myntri khynnah jong ka sorkar pdeng bad u dei peit ia ka ministry water resources ryngkat u MLA barim jong ka Ranikor u Martin M Danggo u la leit ban jurip da lade ban wat lat kumno ban ker ia kane ka wah ban lait na ka jingshah khlong kane ka shnong na ka Um.
Hynrei kane ka jingleit kumba ka long haduh mynta ym pat iohi ka dak ka shin ban don kata ka jingker hynrei ha u snem ba la dep la iathuh ba la ker da ki siej hynrei kine ki siej kiba la ker ruh kila shah rah noh ha kane ka jingshlei um kaba jai mynta ka sngi.
La iathuh ba ka jingpyrshang jong ki MLA kane ka jaka ban wat ki lad ki lynti ban ker ia ka jingkhlong wah Umngi ia ka shnong Balat ka la long naduh ka por jong u Bah Probin K Raswai bam kwai ha dwar u blei haduh u MLA ba mynta u bah Pious Marwein, lada ka sorkar kam leh ei ei ka shnong Balat kan sa jah na ka jingshah khlong ha ka wah Umngi.
