Shillong, Kyllalyngkot 18: Ka cabinet mynta ka sngi kala bethah ia ki myntri sorkar bad ia ki parliamentary Secretary jong ka sorkar ba kin leit ban pynher ia ka lama jong ka Ri India ha ka sngi rakhe ia ka Republic Day jong ka Ri ha kane ka nongbah Shillong kaba dei ka nongbah jong ka jylla Meghalaya bad ha ki headquarter jong ki District bad Civil Sun Division.
Ka juh long ka rukom ba ha ka sngi rakhe ia ka Republic Day ha man ka 26 tarik jong u bnai Kyllalyngkot , ia ka Lama jong ka Ri India hapoh ka nongbah Shillong kaba dei ka nongbah jong ka jylla la juh kyntiew da u Lat jong ka jylla bad u myntri rangbah ka jylla bun sien u juh kyntiew ia ka Lama jong ka Ri India ha Tura.
Hynrei ha kane ka kynti kaba mynta, kan long ka sien kaba nyngkong naduh ba la ioh ia ka jylla Meghalaya kaba pura, ia ka Lama jong ka Ri India ha ka sngi Republic Day kaban sa long ha ka 26 tarik mynta u bnai yn kyntiew da u myntri rangbah ka jylla u Dr Mukul Sangma.
Haba kren ha ki nongthoh khubor ha dien ba la kut ka jingialang jong ka cabinet, u myntri rangbah ka jylla, u la “ U Lat ka jylla u V Shanmuganathan u ba bat ruh ia ka kam kum u Lat ba shipor jong ka jylla Arunachal Pradesh , u la kyrpad ban pynlait ia u ha kane ka kynti kaba mynta namar yn leit ban pynher ia ka lama jong ka Ri India ha Itanagar kaba dei ka nongbah jong ka jylla Arunachal Pradesh, la kyrpang ia u myntri rangbah ba un shimti ban pynher ia ka lama jong ka Ri India ha kane ka nongbah Shillong, ha ka sngi Republic Day”
Kane ka jingia pynbeit ba u myntri rangbah jong ka jylla u Dr Mukul Sangma bay n pynher ia la lama jong ka Ri India ha ka sngi Republic Day kan long ka sngi kaba nyngkong ha kane ka jylla Meghalaya. Haba kylli halor kane ka jingleh jong u Lat ka jylla u myntri rangbah u la ong bay m kwah ban kynthoh ei ei, hynrei kane ka dei ka jingkyrpad jong u Lat ka jylla.
