Mawngap, Iaiong 21: U Bai Taba General Secretary jong ka kynhun “Indigenous Faith Society Jong ka jylla Arunachal Pradesh” ha ka jingkren jong u ha ka jingialang kaba 32 jong ka “Seng Khihlang” kaba la pynlong mynta ka sngi ha Mawngap, u la iathuh ba ka sorkar Arunachal Pradesh kala buh ia ka tnad trei kam kaba kyrpang ban peit bad ban pynneh pynsah ia kina dang bat ia ka niam tynrai.
Haba kren ha kane ka jingialang, u la ong ba ka long kaei kaei kaba sngewtynnad ban iohi ba kum kane ka jingialang ka dang don ban ialeh ban pynneh pynsah ia ka niam tynrai ha pdeng ki Khasi. U la iathuh ba ha Arunachal Pradesh ka long kaba eh ban ia sngewthuh ia ka ktien na kawei ka shnong ha kawei pat bad na kawei ka District sha kawei pat ka District.
Hapoh ka jylla Arunachal Pradesh, u la iathuh ba la buh ia ka 01th Nohprah jong man u snem ba kan long ka sngi rakhe kyrpang ha ka jylla ban pynneh pynsah ia ka niam tynrai. Une u nongialam jong ka seng IFSAP, u khot u wer ia ki briew jong kane ka Ri Khasi ba kin ia poi lang ban sakhi ia kane ka jingrakhe kyrpang jong ki ia ka niam tynrai ha ka jylla jong u.
Ha kane ka sngi la ioh ruh ia ka jingkren na u Thumbui Zeliang general secretary jong ka kynhun “Heraka Zeliangrong” jong ka jylla Nagaland, ha kaba u la pynpsngew ha kane ka jingialang ba na ka liang jong ki jabynriew Naga ruh ki juh pynlong ia kum kane ka jingialang ban pynneh pynsah ia ka niam tynrai jong ki.
Kiwei kiba la kren kiba la wan na kiwei ki jylla ki long, u Balaram Pangcha na Karbi, ka Dr Lamalu Thaimei na ka jylla Manipur. Kine baroh ki nongkren kila pynpaw ia kawei ka sur ba don kam ban pynneh pynsah ia la niam tynrai kaba ki dang iai bat haduh kine ki sngi.
