Ka sorkar ba ka dei ban ai ki kam pynroi sha ki 4 tylli ki shnong ha khappud Bangladesh

Shillong ,Naitung 03: Hadien ba la ïohi ha ki lad pathai khubor ba 4 tylli ki shnong kiba don ha khappud bad ka Bangladesh kiba hab hapoh ka East Jaiñtia Hills District ba ki la byrngrem ban leit ïasoh bad ka Bangladesh na ka daw ka jingshah ieh khunswet ha ka sorkar, ka Hynñiewtrep Achik National Movement (HANM) ka pynpaw ka jingkthang mynsiem ban ïoh sngew ia katei ka khubor.

Haba ia kren bad u nongthohkhubor, u President Rangbah ka HANM u bah Lamphrang Kharbani u la ong ba katei ka seng ka dei ka seng kaba la suit la shor halor ka nongrim ban ïada ia u pud u sam , ka khyndew ka shyiap bad ban ïada ia ka jinglong kyrpang jong ka Jaitbynriew.

Hynrei u la ong ba haba ïohi kum kane ka khubor ka pyndiaw mynsiem ia kane ka seng naba lada jia ba kitei ki 4 tylli ki shnong ki leh shisha kumba ki la kren kan long ka jingduhnong kaba khraw ia ka jylla nalor ba ka dei ka jylla kaba la rit lypa.

“Ngi kyntu ia ka sorkar ba ka dei ban pynstet ban pynpoi ia ki kam pynroi sha kitei ki shnong kiba la mad jingeh la bun bun snem namar ngi sngewthuh ba lada kitei ki 4 shnong kin leit sha Bangladesh u pud u sam ka khyndew ka shyiap ruh ka leit lang”, ong u bah Lamphrang Kharbani.

Utei u nongialam ka HANM u la ong ba kaba kham ma shuh shuh ka dei ioh ba ki nongshong shnong kane ka jylla kiba sah ha khappud bad ka Assam ruh ki shim da katei ka juh ka rai bad u pud u sam ka jylla un nang khate na baroh ki liang.

“Ngi kyntu ia ka sorkar jylla ba ka dei ruh ban pynstet ban pynpoi ia ki kam pynroi sha ki shnong kiba don khappud bad ka Assam, namar lada ki paidbah kiba don ha kitei ki thaiñ ki ioh jingmyntoi na ka sorkar Assam kan poi ruh ka por ba kin kwah ban leit ia soh noh bad ka Assam” bynrap biang u President ka HANM.

Lah ban kdew ba ki 4 tylli ki shnong kiba kynthup ia ka Hingaria, huroi, Lahalein bad Lejri kiba don palat ïa 5000 ngut ki nongshong shnong ki la pynpaw ka jingsngewbitar ia ka sorkar Meghalaya bad kumjuh ka sorkar India na ka daw ka jingshah iehbeiñ katei ka thaiñ ha kaba ia dei bad ka surok bad ki la byrngem ruh ban pan jingiarap na ka sorkar Bangladesh bad ban leit ia soh syndon bad ka Bangladesh.

 

What Next?

Recent Articles

Leave a Reply

Submit Comment

*