Shillong, Nailar 31: Kumba ka long mynta la pynjlan ia ka por ban leh Aadhaar haduh ka 31 tarik Nongprah mynta u snem 2017, ka iing bishar ba don burom ba ha khliehduh jong ka Ri India kan dang shong bishar biang ha u Nawieng, na ka liang jong ka MPCA ka kyntu ia ka sorkar bad ia baroh ki tnad sorkar, ki jaka pule bad ki kompeni jong ki riew shimet ba kim dei ban leh da ki buit poh ban pynbor ia ki briew ba kin leh Aadhar.
Hynrei na ka liang jong ka sorkar, ki tnad sorkar bad ki kompeni jong ki riew shimet ki dei ban ap haduh ban da ioh ia ka rai na ka iing bishar ba don burom bad kidei ban ithuh ia ka rai jong ka iing bishar ba ha khliehduh jong ka Ri ia kaba la rai ha ka 24 tarik mynta u Nailar ia kaba ki khyndai ngut ki nongbishar kila ai ha kaba ia dei bad ka hok jong u briew shimet.
Ha ka juh ka por ka Aadhaar Act 2016 kala kren shai ba kam shym la pynbor iaki briew ba ki hap ban leh hynrei ka shong ka ka mon shimet bad khamtam eh ia kito ki khynnah kiba dang hapoh ka 18 snem ka rta namar ba kim pat lah ban shim ia ka rai jong ka Lawei na ka bynta ia lade.
Ha ka juh ka por na ka liang jong ka MPCA ka kyntu ia ka ing bishar ba ha khliehduh ba don burom jong ka Ri India ba lada long kaba lah ban kham pynkloi ia ka jingshong bishar ha kaba ia dei bad kane ka kam Aadhaar, namar shi bnai ka por ka long kaba lyngkot khamtam eh na ka bynta ka jylla Meghalaya bad Assam, la ong u Rev Dr. P. B. M. Basaiawmoit, Rev. Kyrsoi Pyrtuh, Bah Auguster Jyrwa ha ka jingpynlait khubor mynta ka sngi ha ka kyrteng jong ka MPCA.
