Shillong, Jylliew 23: U myntri rangah ka jylla u Dr Mukul Sangma mynta ka sngi u la plie ia ka jingialang kaba ia dei bad ka bylla shipsah sngi kaba hap hapoh jong MGNREGA kaba la pynlong hapoh jong ka Convocation Hall jong ka skul bah NEHU.
Haba kren ha kane ka jingialang na ka liang jong u myntri rangbah ka jylla u la ai ka jingiaroh ia ki VEC kiba la trei shitom naduh ba sdang ka MGNREGA ha u snem 2006 bad mynta kane ka jingtrei kala dap shiphew snem ha kaba ka sorkar kala ia don bynta lang bad kane ka ai jingmyntoi ia ki paidbah ha ka liang ka ioh kam ioh jam.
Ha kane ka skhim ka jingmang ia ka pisa ka long ka jingbha 60 bad 40 bad kane ka la nuh ia ki VEC ha ka jingeh, hynrei dei ha u snem mang tyngka 2016-2017 ba la mang san lak tyngka na ka skhim CMSRDF na ka bynta ban shna ia ki jingtei kiba pynmyntoi ia ki paidbah. Hynrei ka jingeh kaba ka sorkar ka ia kynduh ka dei ka jingsiew ia ka bai sngi namar ki don ki khep ba ka sorkar pdeng ka pynlait slem ia ka pisa.
Khnang ban nym don kano kano ka jingeh ha kaba ia dei bad ka jingsiew ia ka bai nongsngi ka sorkar jylla kala buh kyrpang ia ka pisa T.37.00 klur hapoh jong ka State Employment Guarantee Fund (SEGF) kane ka pisa ka long ban siew ia ka bai nongtrei lada jia ba ka sorkar pdeng ka pynslem ban pynlait ia ka pisa bad ka jylla Meghalaya ka long kawei na ki jylla kiba la leh ia kane.
Kumba ka long mynta ka jingsiew ia ka bai sngi sha ki nongtrei ka long ba la shu phah ia ka pisa jong ki sha ka bank account jong kito kiba ioh ia kane ka bylla shispah sngi. Kumba ka long mynta kane ka jingpyntrei ia ka bylla shispah sngi ha kane ka jylla ka long kawei na kiba biang tam eh ha ka jylla namar ba la ia khleh lang bad ka IBDPL bad ka MGNREGS. U myntri rangbah ka jylla u la kren ruh ha kaba ia dei bad ka live stock mission.
Kiwei kiba la ia don lang ki long u Pro VC jong ka NEHU u Prof Henry Lamin, u myntri ba dei peit ia ki kam ri mrad u Bah HDR Lyngdoh, u Commissioner & Secretary, C & RD u P Sampat Kumar ka Secretary, C & RD bad Mission Director, SRES, I R Sangma.
