Shillong, Rymphang 5: U bah Himalaya Shangpliang MLA jong ka Mawsyrnam ba dei na ka seng Congress u la pynpaw ia ka jingsngewkhia kaba jur halor kane ka jingiakhih sangeh kamai ki kali kamai ha ka jylla, u la ong ba u ruh u sngew ban ai ka jingkyrshan MJACCV.
Kum ka kynhun ka MJACCV ki don hok ban dawa na ka sorkar, hynrei ka jingmynthi jong ka sorkar bad ka jingbym shim khia kala wanrah pynbna ia kane ka jingeh ia ki paidbah bad kum juh ia ki nongkyndong bad kane kala ktah ia ki nongkhaii pateng kiba pang kiba shitom ban ioh ia ki jingsumar.
Ha kine ki ar lai sngi bala sdang kane ka jingsangeh ki kali ban kamai, u bah Himalaya u la ong ba u la ioh ia ka jingud jingnam jong ki paidbah na kylleng bad khamtam eh na ka konstitwensi kaba u mih khmat.
U Himalaya u la ong ba ha u snem 2020 ba dang don ka khlam CORONA ka sorkar kala pynkiew ia ka dor bai shong kali bad ka pynduna artad ia ka jingkit briew ban shong hapoh kali, hynrei mynta ynda la pynjynsur ia ki SOP, kala pynphai biang ia ka dor kaba rim khlem da pyrkhat ba ka Petrol kala dang kiew man ka sngi.
U MLA jong ka Mawsynram u la ong ba ka sorkar ka dei ban pyrkhat shuwa ban pynkylla ia ka dor jong ki Taxi, shuwa ban pynhiar ka la dei ban khot ia kren ia ki nongniah kali ban ia mir jingmut lang hynrei khlem da khot la shu leh kumba ki sngew ba dei ban leh bad dei hangta bas a poi kane ka jingsangeh kamai.
‘Nga shimet nalor ba nga kyrshan ia kane ka jingdawa jong ka MJACCV, ha ka juh ka por la ong ruh ba ka sorkar kala dei ban khot ia kren noh mar dor khlem da pynshlem bad dei bans hong ban wan rah ia ka jingiapynbeit, lem kumta ki nongkyndong ki nongrep kila jynjar bha.
Kane ka jingsangeh kamai ki kali kamai kala ktah ia ki nongpang kiba dei ban wan shim dawai sha Shillong, bad kum juh ia ki nongwan jngohkai pyrthei, kane ka ktah ia ka ioh ka kot jong ka jylla, haba phai sha ka khajna ka sorkar jylla kala shim haduh T.31 tyngka.
La ong ba ka sorkar pdeng ka shim tang T.19 tyngka, kumta na ka liang jong ka sorkar jylla ruh ka dei ban kham pyrkhat ha kaba shim ia ka khajna tang na ki kali hynrei dang don bun ki lat ban shim khajana ka sorkar ka dei ban shim noh ia ka rai ban pynbeit ia kane ka kam.
