Shillong, Lber 11: U Myntri Rangbah ka jylla u Conrad K Sangma haba jubab ia ka jingkylli bala wanrah da u bah Nujorki Sungoh MLA ha kaba ia dei bad ka jingpynjlan ia ka rta thung, kum na ka liang jong u myntri rangbah ka jylla u la ong ba ka sorkar ka dang bishar bniah ia kane ka jingdawa ban pynjlan ia ka rta thung kam.
Haba jubab ia ki jingkylli bynrap, u mytnri rangbah ka jylla u la ong ba ka rta wat kam ha ka jylla ka long haduh 27 snem bad la pynjlan da san snem ia ki riewlum bad ki rit paid, hynrei ha ka kam pulit pat ka long haduh 21 snem, katba ia ka rta thungkam nonghikai pat la pynjlan sha ka 27 snem.
U Myntri rangbah u la ong ba dei halor kane ka bynta ba ka sorkar ka dang hap ban bishar bniah ia kane ka bynta, namar ka rta kam dei ban ktah ia ki samla wat kam bad ha ka juh ka pork am dei ban ktah ia ka jingtrei kam jong ka sorkar, halor kane ka jingdawa ban pynjlan ia ka rta wat kam ka sorkar ka dang bishar bniah.
U Symbut Myntri Rangbah ka jylla u bah Prestone Tynsong haba jubab ia ka jingkylli u bah George B Lyngdoh MLA, la iathuh ba ia ka jingkieng ha Dwarksuid la antad ba yn lah ban pyndep ha kaba kut jong mynta u bnai.
Ia kane ka jingtrei la ai sha ka M/s Shillong Express Way Company Private Limited bad ia ka jinglut baroh yn dei da ka National Highway Authority of India, ka sorkar kala bthah ia u Chief Engineer ka National Highway ban peit ba ka jingtrei kan iaid beit bad la aiti ruh ban peit wat ha ka kyrdan jong u Chief secretary bad Additional Chief Secretary ban peit ia kane ka kam.
