Shillong, Risaw 16: Ka seng All Khasi Hills A.chick Federation (AKHAF) da ka jingsngewskhia halor ka jingshah pynjot jong ki 12 tylli ki iing ha ka shnong Kalapahar kaba hap hapoh jong ka Ranikor Block jong ka South West Khasi Hills District kala leit ba ai jingiarap mar 10 klio u khaw shitnum iing.
U General Secretary jong ka seng u John D Sangma u la ong ba kum ki dkhot jong ka seng kila leit sha katei ka shnong ban ia kynduh ia kito ki long iing kiba la shah ktah ha kane ka jingshah pynjulor ha ki hati khlaw.
U John D Sangma u la ong ba naduh ba la jia kane ka jingshah pynjot ki iing ha ka 12.10.2020 haduh mynta na ka liang jong ka District Administration jong ka South West Khasi Hills District kala phah ia ki briew jong ka tnad Wild Life ba kin jurip, hynrei kaba sngewsih ka long ba haduh mynta kim pat ioh jingiarap ei ei.
Na ka liang jong ka seng AKHAF ka daw ba ki bor sorkar ki dei ban ai ia kitei ki long iing da ka skhim shna ing ba duk ba kin ioh noh ban shna ia ki iing ki sem jong ki namar mynta don kiba sah ha iing dorbar bad don pat kiba la leit sah ha iing jong kiba ha iing.
La iathuh ba ka jingpynjot ia katei ka shnong da ki hati khlaw ka long ha ka por mynstep bad jan miet ar sien ha ka shi sngi bad la iathuh ba ki don haduh 7 tylli ki hati khlaw bad kine ki juh ki hati mynta u snem ha ki bnai Lbet kila pynjot ia ki iing ha Rajau ruh. La aithuh ba ki don bun ki hati ha katei ka thain.
