Shillong, Nailar 26: ka jingialang bah jong ki khlieh nongsynshar na ka thain Upper Shillong kaba la long mynta ka sngi ha Madan Umlyngka, kala shim ia ka rai ban thoh biang sha ka sorkar halor ka kam MUDA bad ia u MLA jong ki u Bah R V Lyngdoh ban pynbor ia ka sorkar ba kan khot ia ka jingiashong dorbar kyrpang ban wanrah ia ka jingjylla ha ka ain jong ka MUDA ia ka Meghalaya Buidling Bye Laws, ba ka sorkar ka dei ban leh kloi lan.
Ki nongkren kiba kham paw ha kane ka jingialang kaba la long mynta ka sngi ki long u Bah Pynshngianglang Syiem, Chief Executive Member jong ka KHADC ha ka jingkren ka jong u la ong ba ka jingbakla jong u wei u briew ka pynjynjar ia ki paidbah, ki shnong ki thaw, ki dorbar shnong. U kyntu ia ki paidbah ki shnong ki thaw ba ki dei ban ia tylli kawei, u la ong ba dei ka District council kaba iarap ia ki shnong ki thaw ia ki dorbar shnong.
Ha ka jingkren jong u Acting Syiem jong ka Hima Mylliem, u Pa’im Ricky Nelson Syiem, u la ong haba ki briew ki shna shna iing ki shna ban im ym ban iap, ka jingshna iing ka long ban da na ka lyer u slap bad balei ka MUDA ka shim pisa shibun ban ioh ia ka certificate ban shnong ha ka iing ynda la dep ban shna ban ioh ia ka light ia ka um.
Kong Tellinia Thangkhiew, kala ong ba ka seng HSPDP kala pyrshah ia kane ka jingkyntur pud ka MUDA, kala kynnoh ba kane ka jingkyntur pud ka long ban ioh ban pynheh ia ka skhim JNNURM lada lah ban pyniar ia u pud jong ka sor ka skhim run kan wan shibun.Kiwei kiba la kren ki long u Bah R Blah, u Bah Don War na ka synjuk ki rangbah shnong.
Ki paidbah kiba la ia poi sha kane ka jingialang paidbah na ki shnong kiba la shah ktah ha ka jingkyntur pud ka MUDA ki long kum ba sawspah tam ei ei, ia kane ka jingialang la pyniaid da u Bah P Nongneng u ba dei u rangbah shnong ka Mawklot
