Shillong, Naitung 28: Ka seng ki nongkhaii, Meghalaya Minerals Exporter Chamber of Commerce’s ka pynpaw ia ka jingsngew diaw ia ka jingleh ka sorkar jong u Dr Mukul Sangma, haba ia dei bad ka jingpynslem ban ai jingbit ia ki mining plan haba ia dei bad ka kam mawshun. Ka sorkar ka la pynmih ia ka rule kaba la tip kum ka “The Meghalaya Minor Minerals Concession Rules, 2016”.
Katkum kane ka rule kaba la pynmih ha ka 12th September, 2016 la bthah ia ki trai par, kiba shim wai ia ki par katkum ka section 6 jong katei ka rule la btah ia ki trai par, kiba shim wai ba kin apply ia ka mining lease da kaba pynbiang ia ki kot ki sla kumba la buh hapoh katei ka rules. Katkum kane ka rule bun ba la apply ia ka mining lease da kaba pynbiang ia baroh ki kyndon hynrei kaba lyngngoh ba ka sorkar haduh mynta kam pat ai iaka jingmynjur ka jong ka.
Na ka por sha ka por ba u myntri rangbah ula ju kren ha kaba iadei bad kane ka rule kaba la shna da ka Mining and Geology Department kaba u myntri rangbah hi u bat ia kane ka tnad sorkar.Na ka liang ka MMECC ka buh ka jingkylli ia u myntri rangbah, kaei ka jingeh ia ka sorkar ba kan ai noh ia ka jingmynjur ia ka mining lease wat hadien ba ki la dep apply mynta la bun bun bnai. Kane ka jingpynslem jong ka sorkar u Dr Mukul ka dei ka jingpynshitom bein ia ki paidbah kiba im jakpoh na ka kam mawshun, ym tang ia ki trai par hynrei ia ki nongbylla ruh kumjuh.
Ka MMECC ka dawa na u myntri rangbah ba u dei ban ai noh ia ka jingmynjur haba iadei bad ka mining lease ia baroh kito kiba la apply. Dei ka sorkar hi kaba la bthah ban shna ia ka mining plan haba ki trai par ne ki nongshim wai par kila leh katkum ka jingbtah jong ka sorkar te kaei pat kaba la pynlong ia ka sorkar ban nym lah ban ai ia ka mining lease haduh kine ki sngi.
