Shillong, Nailur 26: Mynta ka sngi u bah Tisharding Kharkongor rangbah ka shnong ka Mawkasiang u la plie ia ka ophis treikam jong ka seng Hynniewtrep A’chik National Movement (HANM) hapoh jong ka shnong.
Ha ka jingkren u bah Kharkongor kum u kongsan ha kane ka sngi u la ong ba kumba ka long mynta ka jylla kam pat don ia u pud u sam ba pura, u la ong ba ka sorkar kala shna ia ka iing khlem u pud u sam, kala dei ban tip noh ia u pud u sam.
Haba ia dei bad ka seng HANM u la ong ba kum ki dkhot ka seng ki dei ban long ki briew kiba tip briew tip blei, wat lada kane ka ophis kaba la plie mynta ka sngi ka long kaba rit hynrei kim dei ban niew thala ia ka namar ha kane ka jaka kin sain dur na ka bynta ka jaidbynriew.
U la kyntu kum ki dkhot jong ka seng ki dei ban ia tylli kawei bad kano kano ka kam sdang na ka barit ban poi sha ka thong jong ka jingjop bad u ai ka jingkit bok ia ka seng ba kin dang lah ban ia tynrong lem ia ka khia ka shon jong ka jaidbynriew.
Ha ka jingkren jong u bah Kyllan S Thongni Vice President ka seng, u bah Louis Dohtdong Assistant general secretary ka seng baroh ar ngut kila ban ia kawei ka phang bad kata ka long halor u pud u sam kaba ym pat lah ban ia pynbeit haduh mynta bad ka jylla Assam, kane ka dei ka nongrim ba ka seng ka ieng.
U bah Dohtdong u la ong ba ka seng kam shim khia ia kane bad ka dawa na ka sorkar jylla ba ha u snem 2022 ba ka jylla Meghalaya kan rakhe ia ka jingdap 50 snem jong ka jylla ka jingai sngewbha sha ki paidbah kaba ka sorkar kan ai ka long ba ka jylla kan ioh ia u pud u sam ba pura.
Kiwei kiba la kren ha kane ka jingialang ki long u bah Franklin Mawri rangbah shnong Diengiong, u bah Kyrshan Marbaniang nongaibuid ha ki kam ain, ia ka jingduwai la ai da u bah Arphul Kharbani, ha kane ka sngi la don lang ruh ki nongkit kam jong ka seng na Ri Bhoi bad West Khasi hills, ia ka jingialang la pyniaid da u President ka seng kmie u bah Lamphrang Kharbani.
