Shillong, Lber 10: U Myntri rangbah ka jylla u Conrad K Sangma haba jubab ia ka jingkylli u Saleng A Sangma ha kaba ia dei bad ki samla kiba la wan phai sha la ki shnong na ka daw jong ka khlam COVID-19, la iathuh ba baroh kiba la wan phai ki long 95189 ngut.
U Myntri rangbah u la ong ba ha ka bynta kaba nyngkong ka sorkar kala dep ban jied ia ki 500 ngut ki samla ba kin ioh jingiarap na ka sorkar ha kaba ki lah ban seng ia la ki kam ki jam bad ha ka bynta kaba ar la jied 450 ngut.
U Mytnri rangbah u la ba bun na kiba wan phai la thung ia ki sha ki jaka ai jingsumar ha ki jaka ai jingsumar bad hakiwei kiwei ki kam, kane ka long ka jingsdang bad ka sorkar kan dang ai shuh shuh ia ki lat jingiarap na ka bynta kiba dang sah.
U Myntri ba dei peit ia ka tnad sam um u bah Reniktone L Tongkhar haba jubab ia ka jingkylli u bah Mayralborn Syiem ha kaba ia dei bad ka skhim um ha Nongpoh, la ong ba ka sorkar kala phah ia kane ka skhim sha ka 15th Finance Commission hynrei kam shym la mih kyrteng.
Halor kane u MLA ka Nongpoh u la kyntu jur ia ka sorkar ba kan wat ki lat ki lynti na baroh ban pynioh pynioh ia kane ka skhim ringum hapoh katei ka nongbah jong ka Ri District.
U Mytnri ba dei peit ia ka kam bor ding u James K Sangma haba juba ia ka jingkylli u Zenith M Sangma halor ka Ganol Hydro Power Project, na ka liang jong u myntri u la jubab ba ka dor jong kane ka jaka pynmih bor ding kaba dang shna mynta kan pot sha ka T.507.71 klur katban da dep ha u snem 2022.
