Shillong, Lber 06: Ka Sorkar ka dang iohthiah lyngngai halor ka jingpynkhreh ban iada na u khniang Coronavirus, nga la dep ban kyrsiew thiah kumba ar taiew mynta, hynrei jar jar, u Myntri Rangbah , u la dei ban shim ha lade ia ka tnad ka koit ka khiah kum ha kane ka por.
Ka jingiada na ka jingioh rung jong ka jingpang Coronavirus ka dei kaba ha khmat duh mynta naduh ba la kiew kiba ioh ia kane ka jingpang ha India ka la kiew sha ka 30 ngut.
Ia ki kali kiba kit briew kum na Guwahaiti lyngba ka G.S.Road shaduh palat Jaintia Hills la dei ban bthah ba kin deng mask, nangta ba kim dei shuh ban pynieng man la ki jaka kumba ki ju leh hynrei la dei ban pynbeit da ki jaka bakyrpang bym don briew ba shong ba sah namar ngim tip ki long kiba kumno ki briew.
Ka jingphikir ia kine ki kali kiba iaid lyngba ka dei ban long kaba khlain bha namar dei ka leit ka wan kaba pynphriaing ia kum kine ki jingpang; dei ban bthah ia ki Dukan bad Hotel ban husiar na kaba ia khleh bad kino kino ki briew kiba wan na sha kiwei pat ki Jylla katba dang pur kane ka jingpang Coronavirus.
Ki bus kiba wan kit nongpang sha NEIGRIMHS na kiwei pat ki Jylla dei ban ioh jingbit ban rung sha ka Jylla ba kim don ia kane ka jingpang. Ki lad jingiada kum ki sanitizer kim don wat ha ka nongbah Shillong, ki dawai synreit ym ioh na ki Pharmacy ha Shillong.
Tip ki mask kiba thikna ki don ne em ha ki Dukan bad Pharmacy ha Shillong, Tura, Jowai bad kiwei kiwei ki Nongbah, tip la ia ki Doctors ki Nurses bad kiwei kiwei la pynlong ne em ia ki kynja jingiakynduh ban tip kumno bad kaei ba ki dei ban leh kum ha kane ka por bad lada jia ba don kiba ioh ia ki dak ki shim ki ban ialam sha kane ka jingpang.
Ia ki jaka sumar ki la don ne em kiba la khreh kyrpang; la ki jingphong kiba iada ia ki nongsumar baroh shi rynieng “Personal Protective Equipments” ki la don ne em ym tip, la ki dawai dashin ki la don ne em, ban ym long kum ki ksew kyndit suloi haba wan ka jingpang.
Ka jingkhein sting ka long ka nongshun ka bakhraw ia ki bapli ki nongshong shnong. U Bah HS Shylla myntri barim ka sorkar bad u CEM barim jong ka KHADC u kyntu ia baroh ngin phai khmat sha ka jingiada ba kan ym ioh rung kane ka jingpang sha ka Jylla.
Haduh mynta da ka jingisynei u Blei kam pat rung, dang long kumba ngi long, ka tnad ka koit ka khiah ka la dei ban mih sha khmat bad ai jinghikai ia ki paidbah ban long ka jingshngain.
Halor kane la dei ban don ia ka jingiakren hapoh jong ka kabinet ka la dei ban don na ka bynta kane ka jingiada kat bym pat ioh rung kane ka jingpang Coronavirus. Ki paidbah ki angnud ban iohsngew aiu ka Sorkar ka la leh halor kane ka bynta, namar iatip ba ka dei ka Jylla kaba da sahdien ha kiei kiei baroh, kumta dei kit khia bad trei shitom, ban mad ia ka jingeh ka bakhraw.
