Shillong, Naitun
g 15: U Bah Donal V Thabah General Secretary jong ka seng KSU haba kren ha ka jingialang paidbah ka Sohra mynta ka sngi ban pynshai halor ka jingpynrshah jong ka seng ia ka lynti rel, u la ong ba kane kam dei ka sien kaba nyngkong ba ka seng kala ialeh pyrshah ia ka lynti rel ban pynpoi sha kane ka jylla, hynrei kila ia khun pyrshah ia kane naduh u snem 1988.
U la ong ba kum ka seng kam kwah ban iohi ba ka jylla Meghalaya kan long kum ka jylla Assam, Tripura bad Sikkim ha kaba ja jingwan tuid jong ki mynder kala taplup ia ki trai shnong da ka jingwan jong ka lynti rel. Ha kane ka jingialang u la kynthoh jur pyrshah ia u myntri rangbah ka jylla, hana ba pynpoi ia ka lynti rel sha Sohra ban pynshlur ia ki kam jngohkai pyrthei.
Kumba ka long mynta da ki hajar ki briew ki leit sha Sohra da ki kali na Assam, kaei ka jingiohnong na ka kam jngohkai pyrthei kam don ei ei namar ba kam don kita ki jaka rung jaka mih ban ia da na ka jingwan jong ki mynder ri. Ka seng ka kren shai kdar ba kan pyrshah beit ia ka lynti rel kata haduh ba ka sorkar kan da pynbiang ia ki lad jingiada na ka jingwan rung ki mynder sha kane ka jylla.
Na kaliang jong ka seng ka pynrem jur ia ki pulit kiba la thwet ia ki dkhot jong ka seng la kumba thwet ia ki lehnoh, la ong ba naduh ka jingjia ha Byrnihat ki dkhot jong ka seng kiba la shah kem haduh mynta kila poi sha ka 25 ngut bad mynta ki don ha byndi. Ka seng KSU ka kyntu ia ka sorkar ba kin pyndon kam ia ki buid ki bor jong ka ban ialeh pyrshah ia ki kam khaii drugs ha ka jaka ban thwet ia ki dkhot jong ka seng KSU.
Na ka liang jong ka seng KSU kala kren shai ba kam juh pyrshah ia ki kam pynroi haba ki wan sha kane ka jylla, hynrei kaba kongsan ka long ba ka sorkar ka dei ban pynbiang shuwa ia ki jaka ai jinghikai kiba biang na ka bynta ki samla ka jylla namar bun na ki samla pule ki hap ban leit sha bar ka jylla ban leit ban pule, Ka seng ka kren shai ba ia ka lynti rel ia mynta kin nym ailad katba kim pat biang ki lad jingiada ban khanglad ia ka jingwan rung ki mynder ri sha kane ka jylla.
Ha ka jingkren jong u samla S Synrem president jong ka Sohra Circle u la ong ba ka sorkar kala ai ki jingkular lamler hana ba ioh kam ioh jam lada wan ka lynti rel, hynrei u la ai nuksa kum ka NEC tang khyndait eh ki khasi kiba ioh kam, ha ka jingkren jong u Rangbah shnong ka Nongrim u Bah Batista Khongphai u la ong u ei uta u myntri rangbah ban wanrah lynti rel khlem ka jingmynjur jong u paidbah. Ha kane ka sngi da ki spah ngut ki briew ki la leit ban sngap ia kane ka jingpynshai paidbah jong ka seng KSU ba balei ka seng ka pyrshah ia ka lynti rel ba kan poi sha kane ka jylla.
