Shillong, Nailur 01: Ha dien ka jingiaksaid kaba tyngeh na ki lai tylli ki District Council ha ka jylla Meghalaya, ka KHADC, JHADC bad ka GHADC ban dawa na ka sorkar ba ka dei ban pynlait ia ka skhim jong ka sorkar pdeng sha ki District kumba la mang na ka Tide skhim kaba T.20 klur tyngka kaba la bat bun bun bnai.
U Chief Executive member jong ka KHADC u bah Titosstarwell Chyne haba kren ha ki lat pathai khubor la ong ba ka KHADC kala ioh ia ka Tide skhim ha ka 9/7/2021 kaba ei ka bhah kaba nyngkong kaba dei na ka bhah mang tyngka jong u snem 2021.
Katkum ki kyndon kiba la buh ka long ba lada ka sorkar jylla ka pynslem ban pynlait ia ka pisa kaba dei sha ki District Council ka sorkar jylla ka hap ban siew ia ka sut katkum ki sngi kiba kala bat ia ka pisa, namar ka sorkar kala pynslem ka KHADC kala dep ban thoh sha ka sorkar ba kan siew ia ka sut kaba shiklur tam.
U bah Titosstarwell la ong ba ka KHADC kala dep ban phah ia ka shithi sha ka sorkar jylla hynrei haduh mynta kam pat jubab, ka pisa kaba ka sorkar ka dei ban siew ia ka sut sha ka KHADC kala long palat ia ka shiklur.
Ka jingduh ki District Council ka long namar ka jingpynslem jong ka sorkar jylla ban pynlait ia ka pisa kaba dei ka bhah kaba nyngkong sha ki District Council kaba dei jong u snem 2020-2021 hynrei ka jingpynslem ka long ba kim shym ioh ia ka bah kaba nyngkong bad kane kala buh ia ki jingeh ia ki District Council ba kin ioh ia ka bhah kaba ar na katei ka skhim jong ka sorkar pdeng.
Na ka liang jong ka KHADC mynta ka dang ialeh ban pynkhreh ia ki skhim na ka bynta ka bhah kaba ar namar ia ka bhah kaba nyngkong dang shuioh shen ia kaba ka KHADC kan pyntrei katkum kai kyndon kiba la buh da ka sorkar, la ong u CEM ka KHADC bah Titosstarwell.
