Shillong, Iaiong 26: U bah Adelbert Nongrum MLA jong ka 18-Shillong North u la ong ba ka sorkar kam dei ban shu khonguh katba dawa kito ki harijan kiba don ha Them Iew Mawlong, ka dei ban pynkynriah ia kina katei ka jaka.
Haba kren ha ki lat pathai khubor mynta ka sngi ha ophistrei kam jong u ha Jaiaw Lawsenalane, la ong ba ka sorkar ka dei ban pynshai kita ki 342 tylli ki long iing, katno tylli ki dei ki nongtrei sorkar bad katno tylli ki bym dei ki nongtrei sorkar.
U bah Adelbert la ong ba ka sorkar ka dei ban phah ia ki nongtrei sorkar sha ki tnad sorkar kaba ki trei bad ia kito ki bymdei ki nongtrei sorkar dei ban shu ai da ka por ba ki dei ban mih na katei ka jaka bad la da kim mih dei ban kyndang.
U bah Adelbert la ong ba lada ka sorkar kam don ei ei shalyndet ka dei ban leh ia kaba don kam ban lait na ka jingiakynad, ba kito kiba sah ha katei ka jaka ruh ki dei ban sngewthuh ba kin kohgnguh ia kaei kaba ka sorkar ka leh na ka bynta jong ki.
U MLA jong ka 18-Shillong North la ong ba ka sorkar MDA kaba la ialam da ka NPP kala iaid lait ia u na bun ki khep ha kaba ia dei bad kane ka jaka wat la u dei u MLA jong kane ka jaka ruh haduh kane ka khyllip mat ka sorkar ka leh klet ia u.
U la ong ba kampher lada ka sorkar ka leh klet hynrei kaei kaba don kam ka long ba ka sorkar ka dei ban pynkynriah ia kitei kiba sah ha kane ka jaka khnang ban wanrah ia ka jingshong suk shongsain ha ka jylla.
