Shillong, Jymmang 26: U Chief Executive Member jong ka KHADC u Bah Titosstarwell Chyne u la ong ba ka sorkar haduh mynta ka sorkar kam pat phah sha ki District Council ia ka jingpynbna ka sorkar bala ithuh ia u synsar sla tyrpat bad soh marit kum ki marrep ia kaba la pynmih ha u snem 2019.
Haba kren ha ki lat pathai khubor mynta ka sngi ha dien ka jingialang bad ki MDC kiba ki konstitwensi jong ki ki pynmih ia u synsar ryngkat ki ophisar jong ka tnad khlaw ban ia kren halor ki jingeh kaba ki nongrep synsar ki ia kynduh na ka daw ba ki Marwari kim treh thied shuh ia u synsar ha iew dielang ha Mawiong.
Haba ia dei bad ka Transit Pass u Bah Chyne u la ong namar ba ka sorkar kam shym la phah ia ka jingpynbna sorkar halor ba la ithuh ia u synsar, sla tyrpad bad sohmarit kum ki mar rep, ka KHADC kala aiwai ia ki khyrdop ha u bnai Lber bad ki nongshim wai kila ai ia ka TP ha kaba ki marwri kin treh shim.
La pynshai ba kabai TP kaba ka KHADC ka buh dor ka long .36 naia ha ka shikilo, na ka liang jong u CEM u la ong ba ki Marwari pat kila shim ia ka kabu ba dei tang ma ki kiba lah ban thied ia u synsar bad ia u sla tyrpat ha kaba kila buh dor katba ki mon bad ban ong u number wei bad number ar na ei ki ioh bor ban buh dor katba ki sngewbit la kylli u CEM jong ka KHADC.
La iathuh ba la shai ka sngi kan don ka jingialang bad u myntri ka kam rep jong ka sorkar jylla ban ia kren ia kane bad ha kane ka jingialang na ka liang jong u CEM ka KHADC un dawa ba ka sorkar ka dei ban buh ia ka dor sorkar khnang ba ki nongrep kin nym shah khniot dor palat. Ha ka jingialang la shai ka sngi kim don lang ki ophisar na ka tnad rep bad kum juh na ka tnad khlaw jong ka sorkar.
U Bah Chyne CEM jong ka KHADC u la ong ba u la bthah ia u Chief Forest Officer jong ka KHADC ban khot ia ka jingialang bad ki nongkhaii ban ia kren shai halor kane ka kam bad kum juh ia ka Seng ki Nongkhaii Marrep. Ka jingshai halor kane kan long sa tang la shai ka sngi ha dien ka jingialang bad ka sorkar.
U Bah Chyne u la ong ba ka KHADC ka kwah ban seng ia kane ka jingeh jong ki nongrep katkum ka lynti bad lada dei ban pynduh noh ia ka khyrdop ruh ka KHADC ka kloi ban pynduh ha dien ba ka jingiakren bad ka sorkar ka ban long la shai ka sngi.
