Shillong, Nailur 17: U Myntri ba dei peit ia ka tnad khlaw u James K Sangma haba juba ia ka jingkylli jong u bah Mohendro Rapsang ha kaba ia dei bad ka jingthung ia ki dieng Palm Oil, la ong ba ka sorkar kam pat shim kano kano ka rai ha kaba ia dei bad kane ka jingtyrwa jong ka sorkar pdeng.
Haba ia dei bad kane ka sorkar Meghalaya ka hap ban da pyrkhat bha bad kumba ka long ki dang ap ia ki jingbthah jong na ka sorkar pdeng ha kaba ia dei bad kane ka skhim, na ka sorkar jylla kam pat don kano kano ka jingthoh kaba la bthah sha ka sorkar pdeng.
Haba jubab ia ka jingkylli bynrap u myntri ka tnad khlaw ka sorkar jylla u la ong ba katkum ka jingkhein ka jylla Meghalaya ka don 3,90,000 lak hecter ki jaka balait ba khlem pat pyndon kam, ka sorkar lada ka shim ia kano kano ka rai kam peit shuwa kyrpang ban iada ia ka mariang.
U myntri ka tnad khlaw la ong ba ka sorkar kan da peit bniah bin pa bin khnang ba kan don ka jingiada ia ka mariang lada jia ba ka sorkar ka shim ia ka rai la ka long ha kano kano ka bynta ruh, ka jingiada ia ka mariang kan logn kaba ha khmat eh.
Haba jubab ia ka jylli bynrap bala buh da u bah Himalaya Shangpliang, u myntri rangbah ka jylla u la ong ba kala don ka jingiakren ha pdeng u myntri ka DoNER, u myntri ka tnad rep ka sorkar pdeng bad ki myntri rangbah kane ka thain shatei lam mih ngi jgn ka Ri India halor kane ka kam thung dieng Palm Oil.
Ha kane ka jingiakren ka jylla Arunachal Pradesh, ka jylla Mizoram kila pynpaw ia ka jingkloi jong ki ban pyntreikam ia kane ka kam thung dieng Palm Oil, katba ka jylla Meghalaya kam shym la ai kano kano ka jingkular namar yn nym lah ban ia pein ban pynjot ia ka mariang.
Kumba ka long haduh mynta ka sorkar kam pat ioh kano kano ka jingbthah na ka sorkar pdeng, hooid ka dei ka jingshisha ba ka bun ka pisa lada pyntrei kam ia kane ka skhim, hynrei ka sorkar kan pynthikna ba kan iada shuwa ia ka mariang namar ka sorkar ka kwah ban pyniar ia ka jingdon ki khlaw.
