Shillong, Naitung 09: U Bah Allfondbirth Kharsyntiew general secretary jong ka seng Meghalaya Hills Farmers Union (MHFU) u la ong ba ha ka jingiakynduh bad u myntri ka kam rep u Bah Banteidor Lyngdoh mynta ka sngi bad ki kdhot jong ka seng na ka liang jong u myntri u la iathuh ia ki ba ka sorkar ka don ka jingpynkhreh ban ialem ia ki nongrep kane ka jylla sha kiwei ki jylla ba kin peit ia ka rukom rep ka jong ki.
Ha kane ka jingiakynduh na ka liang jong ka seng kala kyntu ia u myntri ba ka sorkar ka dei ban buh ia ka dor sorkar ia ki marrep, ka dei ban pynbun ia ki iew dielang bad ban shna ia ki Cold Storage na ka bynta ka jingmyntoi jong ki nongrep. Nalor kine kila ia kren bun kiba ia dei bad ki nongrep ha kane ka jylla.
Na ka liang jong u myntri u la ong ba ka sorkar ka shim khia haduh katta katta na ka bynta jong ki nongrep ha kane ka jylla bad ka sorkar ka wan ki lad ki lynti kumno ban leh ha kaba pynkhlain ia ka rep. Kumba ka long mynta ka sorkar kala ioh pdiang ruh ia ka rukom trei jong ka sorkar Punjab ha kaba ia dei bad ka rep ban bud nuksa kumno ban leh ban kyntiew ia ka kamrep.
