Ka sorkar kan plie 72 tylli ki jaka aiwai ia ki kor  ban kyntiew ia ka rep ha jylla: Conrad

Shillong, Risaw 2: U Myntri Rangbah ka jylla u Conrad mynta ka sngi u la plie ia ka jaka aiwai ba nungkong ia ki kor ha shnong Kyiem ha East Khasi Hills District kaba hap hapoh jong ka Mawphlang Block ban kyntiew ia ka rep ka riang ia kaba la tip kum ka “Custom Hiring Centre”.

Kane ka jingaiwai ia ki kor rep ka long ban pynshlur ia ki nongrep ban pyndon kam ia ki kot ki bor ban kham pynbha shuh shuh ia ka rep ka riang ha ba don ka jingkyrduh ki nong bylla.

Haba plie ia kane ka jaka aiwai ia ki kor ban pyndon kam ha ki jaka rep u myntri rangbah ka jylla u la ong ba kane ka jingplie ia kane ka jaka ka ia hap bha namar mynta ka sngi ka dei ka sngi rakhe ia ka jingdon 151 snem ka sngi kha u Mahatma Gandhi.

U Myntri rangbah u buh ia ka jingkyrmen ba kane kan kyntiew ia ka jingpynmih ai ki marrep ha ki nongrep ha ki nongkyndong ha ka jylla Meghalaya. La khein antad ba ki don kumba san lak ngut ki briew ha ki nongkyndong kiba kamai na ka rep bad don kam ban kyntiew ia ki ba kin kham kiew ha ka ioh ka kot.

Ki kam kiba bun hapoh ka skhim “Megha-Lamp Project” jong ka MBDA, ka long ban kyntiew ia ki nongrep ban kham pynmih shibun shuh shuh ki marrep bad ki kor ki shim ia ka bynta kaba khraw ban iarap ha kaba kyntiew ia ka rep ka riang, la ong u myntri rangbah.

Ha kane ka sngi u myntri rangbah u la sam ruh ia ki Shawla kiba pynduna ka jingpynmih tdem sha ki nongshnong shnong ia kiba la shna da ka tnad pynneh khyndew jong ka sorkar jylla

Ha kane ka sngi u myntri rangbah u la ong ba ki don haduh 1350 tylli ki shnong kiba la ioh ia ka jingmyntoi lyngba ka MBDA bad kum kine ki jaka aiwai ia ki kor yn sap lie shuh haduh 72 tylli ki jaka ha ka jylla baroh kawei. Ka jingaiwai ia ki kor kan long ha ka dor kaba tad bha ban myntoi ki nongrep.

Ha ka jingkren jong u bah SK Sunn MLA jong katei ka jaka u la ong ba ka jingdon ki kor ban aiwai na ka bynta ka rep kan iarap ban pynsted ia ka jingtrei kam bad kan pynduna ia ka jingtrei da ka bor met briew. Kiwei kiba la ia don lang ha kane ka long ki long u Dr. Vijay Kumar CEO jong ka MBMA, ka DC jong ka East Khasi Hills ka long I Laloo.

What Next?

Recent Articles

Leave a Reply

Submit Comment

*