Shillong, Iaiong 26: Mynta ka sngi u myntri rangbah ka jylla u Conrad K Sangma u la plie paidbah ia ka skhim thung syieng ia kaba la tip kum ka “Ginger Mission” ha ka jaka ai jinghikai ia ki nongrep ha Upper Shillong.
Haba kren ha kane ka sngi haba plie paidbah ia kane ka skhim thung syieng la ong ba ka sorkar kala mang pisa T.121 klur ban pynlut ha kine ki lai snem ba kyntiew ia ka kam thung syieng ha ka jylla, mynta u snem ka sorkar kan pynlut T.18 klur ban pynmih 2,200 Mt, ki nongrem kiban ioh jingiarap kin don 9000 tylli ki long iing na ki 400 tylli ki shnong ha ka jylla.
Ka sorkar kan pynlut T.6 klur ban hikai kumno ban song ia u syieng bad ban ai jinghikai na ka bynta ki nongrep. Ka sorkar kan buh 30 tylli ki jaka ban pynkhuid syieng ha ka jylla baroh kawei ha ka jinglut kaba T.7.5 klur bad shiklur yn pynlut ha kaba pyniaid iew ia u syieng sha bar ka jylla.
Ha kane ka sngi u myntri rangbah ka jylla la ong ba lyngba kane ka “Ginger Mission” ka sorkar kan kyntiew ban thung ia u Syieng Makhir ba don shibun ka dawai ha une u syieng, la ong ba ka jylla Meghalaya ka dei ka jylla kaba lai kaba bun ha ka jingpynmih syieng ha ka Ri india.
Ka jingthmu jong kane ka “Ginger Mission” ka long ban pynmih ia u syieng kaba 1.5 lak MT ha kine ki lai snem ban wan, kumba ka long mynta ka jylla Meghalaya ka pynmih tang 60,000 MT ha ka shisnem, ka tnad rep kan iarap ia ki briew ban pynioh ia u symbai syieng ba bha kum u – IISR Mahima, IISR Varada bad Nadia bat hung bha kylleng ka jylla mynta.
Ki long iing jong ki nongrep ba kin ioh ia kane ka jingiarap kan long 50000 tylli bad kumba ka logn mynta ka jignthung syieng ha ka jylla ka long tang 10,000 hektar bad da kane ka kshim yn pynheh ia ka kam thung syieng sha ka 12,500 hektar, kane ka long ban kyntiew ia ka ioh ka kot jong ki nongrep ha ka jylla.
U Myntri rangbah la ong ba ka jylla Meghalaya 70 % na ki nongshong shnong ki dei ki nongrep, ha kane ka sngi la sam ruh ia ki symbai syieng sha ki nongrep da u myntri rangbah ka jylla,ha ka jingiadon lang u myntri kam rep u bah Banteidor Lyngdoh bad ki ophisar ka tnad rep.
