Shillong, Naitung 06: Ka tnad rep mynta
ka sngi kala pynlong ia ka tamasa ka iew Sohphan ha All Saint Halls, ha kaba u myntri rangbah ka jylla u Conrad K Sangma u la pynlait paidbah ruh ia ka “Draft Policy” ia kaba la tip kum ka “Jackfruit Mission” ha kaba u myntri ka kamrep u Bah Banteidor Lyngdoh u la ia don lang.
Haka jingkren jong u myntri rangbah ka jylla, u Conrad u ong ba u Sohphan u dei u jait soh ba don shibun ki betamin, kaba kongsan ka long ba hap ban don ia la lynti kumno ban pyniaid iew ia une u soh da kaba pynkylla ia u sha ki jingbam kiba bun jait.
La ong ba kane ka “Jackfruit Mission” ka dei ka shim jong ka sorkar jylla na ka bynta ban iarap ia ki nongrep ha kane ka jylla naka bynta ban kyntiew ia ki nongrep ba kin ioh kamai na u Sohphan u ba don byllai ha kane ka jylla Meghalaya khamtam eh sha ki nongkyndong. Kaba don kam mynta ka long ban ai ka jingkyrshan ia ki nongrep.
U la ong ba ka sorkar kala dep rai ban thaw ia ka tnad sorkar na ka bynta ban peit kyrpang ia ka jingpynmih ia ki jingbam kiba dei na ki kynja soh kiba mih na kane ka jylla Meghalaya, kane kan iarap ia ki nongrep ha kaba pyniaid iew ia ki marrep da kaba pynwan dur ia ki ha ka rukom ban pyniaid iew ia ki marrep. Kane ka long ka tamasa kaba nyngkong ha ka kyrdan bala pynlong da ka jylla.
Haka jingkren jong u myntri ka tnad kam rep u la ong ba dang shen ka sorkar kala ia kynduh ia u myntri kam rep jong ka sorkar pdeng ha kaba kila ia kren kumno ban kyntiew ia ki nongrep ha kane ka jylla Meghalaya, u la kyntu ia ki ophisar ba kin peit ba ka rep ka dei ban kyntiew ia ka ioh ka kot jong ki nongrep.
Haka jingkren jong u KN Kumar Additional Chief Secretary, u la ong ba 75% u Sohphan ha kane ka jylla la juh pynsep ei, dei na kane ka daw ba ka sorkar kala wanrah ia kane ka “Jackfruit Mission” ban pynsngewthuh ia ki nongrep ban nym pynsep ei ia une u soh. U la ong ba ha kane ka Mission ka sorkar kan pynlut 80 klur kumno ban pyniaid iew ia u Sohphan ha kine ki san snem.
Ha kane ka “Jack fruit Mission” ka jingbei pisa kan long 50 klur kan bei ka sorkar pdeng bad ia kaba tam T.30 klur kan sei ka sorkar jylla. Katkum ka draft Policy ka long ba ka sorkar kan wad kilad ki lynti kumno ban pyniaid iew ia u Sohphan u don byllai ha kane ka jylla Meghalaya.
