Shillong, Jymmang 14: U Symbut myntri rangbah u bah Prestone Tynsong mynta ka sngi u la ong ba ka sorkar kala shim ia ka rai ban siew ia ka Rel na ka bynta kito ki ban wan phai shnong na ki jylla bapher bapher jong ka Ri India. Ia kane ka rai la shim mynta ka sngi.
La iathuh ba ka sorkar kala dep ban siew ia ka bai Rel na kito ki briew jong ka jylla ki ban wan phai sha la ka jong ka jylla na kito ki jylla kaba ki don. Kito kiba nongshong shnong jong ka jylla kiba don sha bar kim dei ban don ka jingkhuslai ban ong ba kim don ban Rel.
U bah Prestone u la ong ba kila dep ban shimwai ia ka Rel na ka liang jong ka sorkar ia kaba la tip kum ka Rel ba kyrpang ba kin wan buh ia ki briew jong ka jylla sha Guwahati bad na Guwahati haduh ba kin da poi sha shnong ruh ka sorkar kan siew ia ka bai kali.
Ki Rel kiba ban wan ki long, na Chinai kala dep ban mih bad kan poi ha Guwahati la shai ka sngi, Kaba Na Gujarat kan mih 15 tarik bad kaba na Bangalore kan mih ha ka 16 tarik, ruh kine ki Rel kiba ka sorkar kala dep ban shim wai kine kin sa mih ha ki tarik ba la dep ban pynbna.
Ka sorkar kala thoh sha ka jylla sha ka jylla West Bengal, Maharashtra, Telengana, Kerala, Utter Pradesh, Delhi, Rajeshthan, Andra Pradesh, Uttarakhan, Pynjab, Bihar, Harayana, Goa, Pondichery, Madahya Pradesh bad Jharkhan ka sorkar ka la dep thoh sha ka Tnad Rel ban wan buh ia ki sha Guwahati ia kaba ym pat ioh ia ka jingpynthikna.
