Shillong, Naiwieng 07: U Bah Banteidor Lyngdoh u Myntri ba dei khmih ia ka rep ka riang jong ka Sorkar Jylla ha ka kine ki sngi u la leit jurip ia ka iew dielang kaba don ha 5th Mile, Upper Shillong ban lap hi dalade ia ka jingeh jong ki Nongrep bad kumjuh ruh ia ka jing iaid beit iaid ryntih jong katei ka iew dielang.
Ha katei ka jingleit jurip na ka liang jong u Bah Banteidor Lyngdoh u la iohlad ban iakynduh ia ki Nongrep kiba wan die ia ki jhur ki jhep ha katei ka iew dielang kiba la pynpaw ia ka jingeh ka jong ki ha ki rukom ki bapher bapher ha kaba na ka liang jong u kum u Agriculture Minister u la kular ban shimkhia ban thaw ia ki lad ki lynti na ka bynta ka jingbit jingbiang jong ki Piadbah Nongrep namar ba ia ki mar rep kiba la pynpoi ha katei ka iew dielang la shem ba bun hi kadei ki mar rep kiba la pynpoi da ki nongrep na ki thain Pomlakrai bad kiwei de ki jaka kiba marjan jong ki paidbah jong ka Mylliem bad Nongkrem Constituency.
Hadien jong katei ka jingleit jurip ia katei ka iew dielang na ka liang jong u Bah Banteidor Lyngdoh u la pynpaw ba katei ka iew dielang kadei kaba paka tam ban pynsuk ia ki nongrep jong ka thain, hynrei donkam pat ban pynshlur ia ki Nongrep ban wan rah ia ki mar rep sha katei ka iew dielang.
Ha kawei pat ka liang na ka liang jong utei u Myntri sorkar u la pynpaw ruh ba ka thong kaba hakmat eh jong ka sorkar jylla kalong ban kyntiew ia ka ioh ka kot jong ki Nongrep bad na ka liang ka jong u kum u myntri ba dei khmih ia ka rep ka riang jong ka Sorkar Jylla un sa bthah ia ki officer jong ka tnad Agriculture ban leh ia kaba donkam na ka bynta ka jingbit jingbiang jong ki paidbah nongrep jong katei ka thain. Ha katei ka sngi la synran lang ia u Banteidor Lyngdoh da ki officers jong ka tnad Agriculture.
